係時候將醫藥龍頭再配置組合內
3月26日，大致多雲，日間部分時間有陽光，間中風勢強勁。隔晚美股先低後高，道指早段曾跌348點，至中段止跌回升，最終倒升199點；標指則升20點；納指則升15點。美股早段下跌係因為鮑爺忽然鴿轉鷹，喺接受外媒訪間時，美國經濟復甦速度較預期快，可容許當局於某個時間減少對經濟的支持，將減少債券購買加上美國去年4季度GDP終值意外上修定，市場恐怕聯儲收水要比預期快，早段嚇到美股插水。
不過市場對經濟活動重新開放嘅憧憬，刺激美股中段開始反彈，出行股做好。而因為美國證交會宣布執行《外國控股公司責任法》，要求外國公司須符合美國的統一審計標準，此舉被視為針對中國企業嘅監管行動，市場憂慮中概股面臨更大退市壓力，中概股低處未算低，隔晚繼續插水，剛於港股第二上市嘅百度(09888)，隔晚美股再跌14%，今日喺港股呢邊睇嚟又要跟跌，再創上市新低。
港股喺呢個星期接連失守29000及28000兩大關，期間反彈乏力，跌市成交反而增加，反映沽壓嚴重，而恒指28200頸線失守，若然於下周期指結算後仍未能收復失地，古天后真係無眼睇，重要支持失守，暫時不宜急住估底。而跌勢已成兼反彈乏力嘅高增長股，短線出現特價雖可博超賣反彈，但最好都係即日解決，若然反彈不似預期，必要嚴守止蝕，咪愈坐愈多貨，呢期個市不宜重倉，否則難以轉身。
除咗科技股之外，之前醫藥股亦被殺估值，其中龍頭藥明生物(02269) 較高位120元水平已回吐超過兩成，最多更回吐三成。藥明生物已派成績表，業績對辦，公司喺較早前亦已宣布兩項收購，集團今年將沿去年路徑發展，透過併購去擴大業務版圖及擴闊生產線。而藥明生物去年多次配股，而股價則愈配愈高，今年唔排除照辦煮碗。考慮到藥明生物喺90元水平已作整固，跌勢亦告一段落，已可考慮再上車，係時候將優質醫藥龍頭，再從新配置到投資組合內。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。