債息回穩大市喘定先整固
3月8日，多雲，間中有微雨，間中風勢頗大。早前因為意外受傷，足足休息咗一個星期，而過去一星期大市亦要休息，尤其新經濟股更加好似昏迷一樣，持續回調，唔多識反彈。不過上周五美股終於出現一次較似樣反彈，三大指數反彈逾1%，但以整個星期計算，反映新經濟股嘅納指仍要跌1.86%，重倉新經濟股嘅缸邊友認真難捱，猶如經歷股災。不過喺周末期間，美國參議院通過1.9億美元新一輪刺激經濟方向，道指期貨及喺新加坡黑期都向好，黑期回升至29000水平之上。 近日大市回調，尤其新經濟股調整幅度更深，主要係因為美國10年期國債孳息抽升，不過古天后對港股後市仍有信心，而債息喺現水平開始穩定，相信為咗保持經濟復甦，美國以至全球央行，將繼續維持低息政策，唔會隨便或提早閂水喉。美國大規模財政刺激政策，需要涉及大額發債，為保持低發債成本，聯儲局對債息抽高，唔會坐視不理，適當時候自然會出手控制。 近日債息上漲係反映市場預期經濟反彈及通脹升溫，但科技股跌調整幅度更大，主要係個別科技股估值其高，市場稍有風草吹動，引發殺估值。踏入業績期，古天后相信喺新經濟股基本面未見重大改變，盈利能力維持，兼有現金流入嘅現金牛科技股，交出亮麗業績後，資金最終會從新審視，重回高增長股懷抱。 雖然唔少專家指隨着經濟漸漸重回正軌，板塊輪動嘅浪潮下，傳統經濟股今年很可能會跑贏科技股，但對於大部份北水基金而言，高增長嘅相對傳統股仍較吸引，只要市況回穩，喺估值高嘅新經濟股被連番殺價後，追求高回報嘅新一代投資者，仍難抗拒新經濟股。 不過古天后亦贊成今年要扭轉去年貪新忘舊嘅策略，調整投資組合，適度加入舊經濟股，貪新之餘勿忘舊，當中以消費股及經濟重啟疫後概念股可以睇高一線。至於債息上漲令息差擴闊，利好金融股，有指今年金融股將成為經濟復甦贏家。不過債息抽息對銀行唔係只有正面刺激，一旦債息抽升過急，將限制消費者及企業活動，而商業地產抵押貸嘅抵押物商業地產價格亦相當唔穩定，對較小型銀行嘅盈利來源，容易造成不良貸款率攀升。相對金融股，古天后認為資源股跟基建股更為可取。 至於大市方面，暫時喺債息升勢未見進一步升溫下，港股呢一輪調整或已接近尾聲，但仍需要時間整固，估計喺3月底前恒指或先於28800至30000之間上落，新經濟股喺現水平得到支持橫行整固，打好個底喺下一季即4月復活節假期後再從新出發。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。