兩會將至 留意題材板塊
2月22日，天晴，日間溫暖，雖然春回大地，但呢個春天唔算潮濕，呢排嘅天氣都幾舒服。美股上周五高開後無以為繼，三大指數窄幅上落，道指雖然盤中再刷新高，曾升154點，但最終升幅全部蒸發，收市幾乎持平，升不足1點；而標指則跌7點；納指則升9點。總結一星期，道指、標指、納指分別累升0.11%、下跌0.71%和下跌1.57%。
雖然坊間唔少分析都指美股喺聯儲局維持寬鬆貨幣政策下，或令美股形成泡沫，而拜登政府嘅1.9萬億美元刺激經濟方案或引發通脹，對目前估值已高嘅美股構成風險。不過細摩對美股信心十足，並預測今年標指有機會較現價再升逾一成，目標可見4400點。細摩表示經濟前景乃取決於消費者嘅強勁復甦，由於肺炎疫情開始受控，新增確診個案大幅下降，加上疫苗推出，美國經濟料可於數月內全面重啟，而新一輪刺激經濟方案推出，將進一步加速經濟反彈。
至於港股上周喺A股復市後回調，但總結一周仍錄得升幅，雖然人行略為收，令A股走勢反覆，但恒指回吐壓力唔大，目前都係高位整固，港股短時間內仍有機會再挑戰三萬一水平。今個星期市場焦點將會係周五恒指服務公司季檢結果，以及下周內地兩會期間嘅消息。而港股亦踏入業績高峰期，唔少重磅股商陸續發成績表。
恒指季檢前呢兩三個月，一直進行諮詢，建議恒指成份股數目增加，以及縮短可被納入為恒指成份股上市時間要求。對於增加恒指成份股數目，市場普遍持正面意見，認為增加成份股數目，將更有效反映港股整體表現。至於縮短恒指成份股上市時間要求，市場卻有唔同聲意，尤其新經濟股周期較短，或令盈利表現更波動，上市時間縮減至少於兩年可初納入為恒指成份股，或令恒指未來更為波動。無論如何，缸邊友更關心嘅係將被納入恒綜指嘅新成員，能否被深上交所睇中而點燈，成為港股通成員，而喺古天后心目中嘅候選名單當中，包括物管新貴融創服務(01516)及潮流玩具矚目新星泡泡瑪特(09992)等。
至於下周兩會要關注嘅兩會題材股，不外乎幾個一直熱炒板塊，包括科網股、內需股、新能源股以及電動車股。雖然科技股尤其龍頭巨企，舊年開始受到反壟斷及互聯網監所沖擊，但反壟斷法本身並非針對企業，目的是係打擊阻礙行業創新及影響公平競爭嘅違法行為，長遠反有助維護良好互聯網經濟生態體系。隨着兩會後政策修訂，板塊前景更明朗化，而一直大幅落後嘅阿里(09988)，以及陸續有子公司分拆上市嘅京東(09618)，喺兩會舉行前後，值得睇高一線。至於其餘三個板塊可留意嘅題材股，明日再續。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。