呢期中概股新丁難與快手匹敵
3月22日，氣溫突然急降，一兩日間低咗10度，多雲兼陰陰涼涼，出門口著多件衫注意保暖。上周五美股為「四期結算日」，三大指數表現迴異，漲跌不一，道指跌234點，標指微跌2點，納指則升近百點。港股上周五喺ADR表現唔錯，回升逾百點，重上二萬九關，但恒指又再失守20及50日線，暫時表現仍偏弱，加上成交持續萎縮，反映投資者入市意欲有限。
呢個星期聯儲局主席及官員將會出席國會聽證會，持續嘅貨幣寬鬆政策或引發通脹，令債息持續受壓，呢個星期美國債市勢必波動。目前美國10年債息仍然高企，雖然市場已逐步接受較高債息水平，但債息持續趨升，對股市始終不利。至於中美高層會談一如所料無乜料到，氣氛甚至有啲繃緊，不過市場早已預期中美雙方各持己見，難以一時三刻達成共識，關係亦難見突破，今次中美高層會談對市場影響有限。
目前港股維持上落市格局，恒指於28500至29500之間區間移動，關鍵係能否收復並企穩於50日線(29290)之上，否則港股仍未回穩，而恒指10日線(28963)企穩50日線之上，亦係港股轉穩嘅另一指標。上述兩個指標未能達成，港股難言回穩。
本周唔少重磅科技股將派成績表，當然係市場焦點，其中小米(01810)有消息指今早10點將有重大消息公布，雷軍噚日喺微博發文，表示今日小米有BIG NEWS，更約定投資者今早10時，不見不散。近呢幾個星期，已不斷有傳聞指小米將為其發展電動車業務立項，估計今早嘅BIG NEWS與此有關連，投資者引頸以待。事實上，小米喺有關美國制裁一事暫脫險境後，股價走勢明顯轉強，但目前股價喺28至30元仍有較大阻力，除非消息足以令資金瘋狂掃貨，否則28元阻力仍難突破。
注意明日百度(09888)首日掛牌，同時嗶哩嗶哩(09626)IPO截飛，暫時孖展升溫已突破300億元，超額認為41倍，但相比第一季最熱賣新股快手(01024)，由於Bilibili屬於第二上市股份，上市表現難與快手相比，一手入場費接近兩萬，古天后都係嗰句，抽新股都係抱住抽獎咁嘅心態，無期望自然唔會失望，總之市場對呢期嘅新股熱情已大大冷卻，任何一隻中概股都難再與快手上市表現一較高下。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。