大市仍反覆 切忌反彈急追貨
3月10日，多雲，天氣稍涼，晚上有一兩陣微雨。隔晚美股回升，主要係美國10年期國債孳息率回落，納指報復式反彈盤中曾升超過4%，尾市升幅收窄至3.7%，收報13073點，終止連日跌勢，暫時仍守100日線，但10日線尚未收復，20日線跌穿50日線危機未除。而道指僅升30點，標指則回升1.4%。債息得以回落，全靠財政部拍賣580億美元3年期國債成績唔錯，錄得投標倍數2.69倍。財政部本周將連續三日發行國債，國債拍賣結果將成為市場焦點。
其實古天后對於無論美股或港股呢一輪跌勢，一直強調係調整，而逢回吐吸納亦固有做法，開口埋口股災嘅大淡友專家，即使短暫風光，長期都係市場大輸家，引用古天后老友唐牛嘅一句說話，市場邊有專家，只有贏家同輸家，能夠經得起震盪考驗，笑到最後嘅贏家，咪就係所謂專家囉。早喺上月農曆年假期前，古天后已多次提醒要趁高減倉，輕倉渡假期，直至假期過後，港股急升更加係要趁高食糊，套現準備資金，迎接股市突如期來嘅震盪。
由2月下旬至今嘅調整浪，差不多已接近尾聲，恒指由上月高位31183回落至昨日低位28326點，回吐2857點，剛好係自去年12月底26433點起步升至2月高位，累計升幅回吐黃金比近0.618，相信呢一輪嘅調整已見底。而是次回調幅度最大嘅新經濟股及高增長股，喺早兩日亦開始呈現超買，古天后噚日亦已表示，650元樓下嘅騰訊(00700) ，300元樓下嘅美團(03690) ，以及220元附近嘅阿里(09988)可以放心入場收集，預期呢幾隻龍頭，今日會有較顯著反彈。
噚日港股一度由低位反彈逾700點，主要靠一個消息，有指國家隊南下掃貨，但至午後港股再次回落，升幅縮水至232點，而港股通最終更係再錄得近90億元淨流出，周一周二累計兩個交易日，北水累計淨流出超過220億元，反映國家隊嚟港股救市，只係缸邊友一廂情願。尤其係內地股市自顧不暇，北水要救都先救A股，預期呢期北水唔會再好似1月份咁，只買不沽，而係傾向炒上落，咪以為只有散戶短炒，基金大戶同樣會有短線操作。基於市況仍未真正回穩，3月餘下時間都係反覆為主，切忌見反彈回升追貨，急跌驚慌亂斬，維持一個現金水平較高嘅倉位，喺回調時吸納，反彈回升時食糊，更靈活多做短線操作，先有機會安然過渡今個調整浪，迎接下一個升浪。暫時恒指估計仍然會喺28500至29500之間反覆上落，進行整固，新經濟股汰弱留強，估值漸漸回復到一個平衡點，舊經濟股進行估值修復，港股後市方能有更健康發展。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。