大笨象難回復過往風光無謂死守
2月24日，多雲，短暫時間有陽光，氣溫略降，風勢有時頗大。隔晚美股來回地獄又折返人間，早段市場仍憂慮債息回升，通脹升溫，三大指數顯著下跌，幸而聯儲局主席飽爺強調美國將維持寛鬆貨幣政策，喺出席國會參議院聽證會時表示，美國經濟復甦並不均衡，遠遠還未實現完全復甦，未來嘅路仍然充滿高度不確定性，但就目前形勢而言，相信經濟前景喺2021年稍後時候得到改善。但目前距離實現聯儲局目標仲有一大段距離，進一步取得進展依然需時，強調將繼續提供貨幣政策支持，就算前景有改善，亦維持債券購買計劃不變。鮑爺大派定心丸，大部份重磅科技股收復早段跌勢，尾市更拗腰倒升。
噚日大笨象(00005)派成績表恢復派息，但不再設以股代息選擇，亦唔再承諾定期派發季度股息，派息將同業績掛鈎，某程度上係做定預期風險管理，免得股東好似舊年暫停派息時大失預算，而機構投資者亦能從預測其盈利表現同時，推算派息多少。大笨象雖恢復派息，但未有表現將回復回購，加上派息變相減少，股東難再回復坐定笠六穩定收息，吸引力自然大減。觀乎大行喺今次業績公布後，未見提升其投資評級及目標價，相反目標價維持大約平均43元水平，難怪噚日中午派完成績表，股價喺50元之前行人止步。而古天后喺其他平台及專欄已表示，大笨象皇者地位不再，股價要重返50元水平亦有難度，有貨喺手真係要好好諗諗，有冇必要繼續死守落去。
今日市場另一焦點為財爺波叔嘅財政預算案，市場當然希望財爺派糖，但財爺出咗名係守財奴，早已揚言派糖有難度，唔單止咪再妄想全民回水，就連失業及待業人士，都只限提供低息貸款，唔會放水資助；退稅方面更大規模縮水。換句話講呢份budget，基層無糖派，中產亦唔會受惠。至於預算案將首次開創設立政府擔保嘅個人貸款計劃，失業一段合理時間人士可申請在職時月薪6倍、上限8萬元的個人貸款，還款期最長為5年，若期內還清貸款，可申請退回利息。不過回復就業先至係關鍵，失業難以長期借錢渡日，真係借唔借，還得到，先好借。
至於股市暫時仍然係資金輪動，舊經濟股喺市場憧憬經濟復甦，及估值得到修復下有資金追落後，相反之前累計升幅巨大嘅新經濟股，持續受壓，呢個現象要等下一輪重新配置，或者再有新資金入場，新經濟股先會再有運行。坐住大量新經濟股嘅缸邊友，除咗好好控制注碼守好持倉，暫時似乎無計可施，當然倉位較鬆動嘅，可以吼回調吸納，首選仍然係龍頭JATMX。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。