市況未穩轉勢回勇言之尚早
3月12日，天晴，日間溫暖，呢幾日天氣都好，weekend可以考慮郊外走走。美國總統將於周五簽署1.9萬億美元紓困財政刺激，市場憧憬刺激方案嘅部份資金將流入股市，推動美股隔晚做好，三大指數上升。道指升188點再創新高，納指反彈2.5%，標指亦有1%進帳。港股預期今日可隨美股高開，但能否高開高走，古天后無水晶球，但提醒今日係星期五，周末前夕追貨要承擔額外風險，如果早兩日無喺低位撈貨，今日未宜手多。
呢一輪調整係由債息爆升而引發，而呢幾日美國長債息回落，美股唔單止回穩，反映傳統股嘅道指更屢創新高，但港股呢邊仍然落後幾條街，不過能夠重返二萬九水平，都算係一個利好訊號。究竟港股已完成調整，抑或仲有機會再試低位，古天后傾向相信前者。日前喺本欄已表示，恒指落到28500已接近見底，雖然早兩日恒指一度低見28300水平，但唔少個股已發出見底訊號，但要港股扭轉弱勢回勇，大前提係要收復晒所有移動平均線，並於上方運行，暫時10日及50日線匯聚區，即29100-29200點已成功收復，但仍待要企穩兩至三個交易日方能作實。至於20日線喺29743點，暫時為短線阻力，若未能收復此關，港股喺3月餘下時間，傾向區間運行整固，大約喺28500至29700之間上落。
呢段時間如果仍有高追貨底未有趁高位減持，目前只能吼跌市當日撈貨短炒，盡量減輕持貨成本，而高位已去蕪存菁，順利套現當然要講句恭喜，咁依家可以做嘅，就係吼回調時分段建倉。至於貨底唔算貴，但又未有高位食糊，可能持貨經過呢兩日反彈，已重返家鄉又或接近家鄉，呢種情況應該最為糾結，去定留未知可以點做嘅話，古天后認為重倉嘅，喺升市日要拎部份貨出嚟減持，再趁回調時回補，利用部份貨底作短線操作，以及減持重倉位嘅個股，適度調整組合。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。