待兩會召開或有資金重返主題股
2月26日，多雲有幾陣雨，能見度低，灰灰濛濛，同各地股市一樣，一片陰暗慘淡。美國國債孳息急升，一度升穿1.6厘，其後稍為回落至1.5厘，為去年2月以嚟新高。債息急升觸動投資者恐慌，美股3大指數隔晚急挫，重磅科技股沽壓沉重，道指最多跌668點，收市跌559點；標指則跌96點；納指跌勢更為顯著，大跌478點，創自去年10月以嚟最大跌幅。有恐慌指數之稱嘅芝加哥期權交易所波動性指數(VIX)收報28.89，急升35.38%，創自2月1日以來新高。
自今個月中美債孳息上升，美元持續疲弱，投資者重新評估過去一年以嚟，盈利持續上升嘅最熱炒新經濟股板塊；而債息急升誘使資金轉向收益率正上升嘅債券。喺美股搖搖欲墜之際，整餅阿茂無嗰樣整嗰樣，對刺激經濟毫無幫助，更向中產開刀嘅財政預算案，當中建議上調股票印花稅，更令市場怨聲載道，更令北水於預算案公布當日，創紀錄淨流出新高。
港股今年係龍係蟲，要睇北水動向，北水已用腳投票，用沽貨行動表示不滿，但政府已表態，8月1日實施增加股票印花稅，仲話唔會有plan B，完全唔理會反對聲音，睇嚟呢個因素將會繼續困擾大市。而古天后噚日已講咗，要有心理準備港股表現將更為反覆，而新經濟股近日捱沽，主要係資金輪動所致，但據了解，內地公私募基金，認為傳統股短線吸引資金流入短炒，但長線仍然睇好高增長嘅新經濟股，成長股板塊先係主菜，待兩會召開，而大會主題包括新能源、科技發展、消費升級等，若然有更多政策出台，屆時資金有望重返新經濟股。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。