整餅阿茂短視趕客 蠢人治港市民受苦
2月25日，天陰有雨，下午短暫時間有陽光，陰天令氣溫下降，乍暖還寒。隔晚美股顯著反彈，道指升424點創收市新高，標指跟納指分別升44點及132點。雖然呢期資金有轉投傳統股跡象，但瑞銀發表報告指，金融條件收緊將導致全球股市在第2季出現「階段性轉變」，整體回報將下降，增長股表現會優於價值股。報告重點係喺通脹嘅樂觀情緒達到頂峰，而聯儲局又未收水，市場由資金推動，轉為經濟增長及盈利表現主導，講到尾又係要睇返高增長股。咁喺周二晚美股急跌之際，聯儲局主席鮑爺即大派定心丸，指美國將一段時間維持寬鬆貨幣政策，而通脹目標至少要三年先到位，即係呢三年內，美國加息機會微乎其微。市場食咗定心丸，美股即時轉勢，隔晚道指再創新高，鮑爺金口一開，可以話係一場及時雨。
相反港股呢邊，手持大鎖匙嘅財爺，喺近日港股高位整固，搖搖欲墜之際，再向港股伸多腳，喺噚日嘅財政預算案建議將股票交易印花稅由0.1%大幅調高三成至0.13%，港股應聲而下，全城缸邊友圍插，恒指跌近千點，整體市值縮水2萬億元。
諷刺嘅係財爺建議加股票印花稅至0.13%，預計只會為庫房帶嚟逾百億稅收，但噚日市場表態，用腳投票，港股喺破紀碌逾3500億元成交下急跌，單日市值蒸發逾萬億，而港交所(00388)喺加印花稅呢個趕客行為下捱沽，盤中一度跌逾一成，收市跌逾8%，市值單日縮水逾600億。呢一堆數字反映，整餅阿茂『預計』嘅百億稅收未到手，已先唔見咗咁大條數，呢個加稅建議得不償失。
重點係整餅阿茂似乎完全忘記咗全球至今仍受肺炎疫情困擾，經濟受疫情衝擊尚未恢復，中美金融戰不明朗因素仍存在，百業待興僅餘金融業叫受疫情打擊較少，就急不及待向金融業開刀加印花稅，完全係愚不可及嘅自殘行為，喺全球大趨勢減稅而唔係加稅，增加交易成本趕客，削弱金融中心競爭力，倒行逆施，香港喺蠢日治港下，真係咪使旨意有運行。
睇返全球主要股票市場，美國、日本都係唔收股票印花稅，而內地及新加坡只收單邊稅，而港股則買賣雙邊收稅，要吸引更多機構投資者進行頻繁電子交易，理應減稅而非加稅。今次增加股票印花稅，若然令北水及外資減少對港股投資甚至撤離，肯定加稅後令稅收減少；相反若然整餅阿茂有少少智慧，將印花稅維持不變，甚至將雙邊收費削減至單邊收費，喺預期今年更多北水流入，減稅或而有助增加稅收，偏偏阿茂就係唔明呢個道理，更係要玩自殘。
增加交易印花稅實際影響有幾大，暫時仲係未知數，估計短期仍會影響缸邊友心理因素，港股表現會較為反覆，而北水愛股更有機會繼續捱沽，要睇北水究竟幾時肯再入場，若然倉位滿滿嘅，留意控制注碼及風險管理，反彈時或要把握減磅機會，待出現急跌再撈貨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。