新能源股下半年可做好
6月30日，短暫時間有陽光，間中有幾陣驟雨，天氣炎熱。市場一邊靜待呢個星期公布嘅就業數據，一邊熱炒新經濟股，隔晚標指跟納指再創新高，不過收市升勢回順，標指僅升1點，納指升幅則縮水至27點，而道指早段曾下跌，收市倒升9點。美股一路創新高，但一路有淡友唱淡，美國投行Stifel首席股票策略師巴尼斯特警告，從依家到10月底，標指可能出現高達10%回調，指出喺全球貨幣政策更加鷹派嘅情況下，隨之而來就係股市調整。總之目前美股係高處不勝寒，投資者都係且戰且走，提高警覺，一有唔對路要識跳車。
嚟到呢一季兼上半年最後一個交易日，預期點都會有啲粉飾櫥窗活動，今日預計二萬九可以守一守，不過都要睇返A股點行。是關尋日港股本來跟外圍做好，無奈A股腳軟拖累下，恒指收市要跌274點，失守二萬九大關，報收28994點。唔同板塊個別發展，其中新能源股有資金追捧。
上周發改委要求報送二氧化碳捕集利用情況，報送目的係為做好碳達峰、碳中和相關工作，科學評估二氧化碳捕集利用與封存技術及項目現狀，有力有序組織後續重大工程。另外，碳中和背景下，從部委以至地方正加快推進工業綠色低碳轉型，相關部門將進一步強化頂層設計，醞釀出台《「十四五」工業綠色發展規劃》，打造一批綠色園區、綠色工廠等，以加快工業綠色低碳高質量發展。喺一眾再生能源股之中，古天后較睇好龍源動力(00916)，而另一隻可以留意嘅係華潤電力(00836)，雖然公司仍有一半業務為傳統火電，但另一半新能源業務好似未有反映喺估值上，唔排除有估值重評，股價若然追落後，上返12元應該冇難度。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。