港股二萬八假穿或真失守將成後市關鍵
3月25日，天晴，氣溫略為回升，下周天氣再轉炎熱。隔晚美股科技股又再洗倉，尤其中概股跌幅更為顯著，主要係美國證交會引入措施,，可能將部份中概股除牌，消息拖累中概股慘遭洗倉。中概股嘅跌勢伸延至整個科技板塊，就連大型科技股全線向下。道指雖然早段曾升逾300點，但重磅股受拖累，最終抹去所有升幅，標指則跌21點；納指跌勢顯著，跌幅達2%。
其實中概股需要符合美國證交會嘅新指引，已經唔係今日先講嘅新議題，舊年呢個消息，反而令市場憧憬中概股將大量回流港股上市，港交所(00388)反被捧上天。同樣一個消息，一個理由，當市況逆轉就轉換一個解讀方式，完全漠視呢批股份即使退市美股，仍可以回歸港股上市。其實第二上市股份，一直未被納入港股通名單，其中一個原因正正係兩地上市股份可以互換，內地擔心一旦容許北水買入第二上市股份，相關持份者將港股轉換為美股，令資金流出中國範圍，流至美國，變相助長走資，呢樣係阿爺唔想見到嘅情況。
如今美證交會出手，逼使中概股退市，反而令已於本港第二上市嘅中概股，包括阿里(09988)及京東(09618)於美國退市，為日後被納入港股通鋪路。問題係港股自上月底港府建議提高交易印花稅後，成交持續萎縮，即使中概股於美國退市，亦未必選擇嚟港股上市，喺內地股市向外資更為開放下，或考慮直接回A，呢個係會拖累整體於港股上市嘅中科企表現，可見增加印花稅嘅決定影響深遠。
港股上日跌穿28000點心理關口，重點係失守28200點頸線，形態上頭肩頂形成下破頸線，極為利淡，破頂向下一個重要支持區26000至27000尋找支持機會大增。若以去年3月低位21139點升至今年2月高位31183點整個升浪計算，調整黃金比率0.5幅度計，支持位則在26,161點水平。呢一個位亦相當接近周線圖50周線25906點，當然恒指20周線28048點要確認失守，港股先會急轉直下。下周二為期指結算，若然喺結算後恒指能重上二萬八關回穩，港股再大跌機會唔大，反而會喺二萬八水平橫行整固，復活節假期前，期指結算後，港股表現將會係未來一季港股走勢關鍵。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。