港股對北水吸引力有增無減
經濟數據表現參差，美國上週首次申領失業救濟人數為86.1萬人，預估為77萬人，前值為79.3萬人。有分析指上周美國初請失業金人數意外上升，但隨着額外財政刺激及新增新冠肺炎確診病例數下降，更多服務性企業得以重新開業，勞動力市場正穩步復甦。
北水噚日回歸，繼續積極掃貨，淨流入金額接近150億元人仔，其中買得最多係騰訊(00700)及中移動(00941)，兩者分別錄得超過39億元淨入；而港交所(00388)跟中海油(00883)亦係北水大手掃貨對象，兩者分別錄得12.3億及18.7億淨流入。不過美團(03690)則錄得2.2億元淨流出，而尋日急跌嘅心動公司(02400)及恒騰(00136)則錄得超過2億元淨流出。而北水沽得最勁係呢兩個月升勢驚人嘅保利協鑫(03800)，全日錄得4.8億元淨流出。除咗美團之外，錄得淨流出嘅股份，都係近日急升得相當急速嘅中細價股，相對美團逾二萬億市值，2億幾嘅淨流出北水，真係濕濕碎，相對保利協鑫七百幾億市值，四億幾嘅淨流出北水，已經係一個唔細嘅數目。
北水主導港股既成事實，咁究竟北水喺今年餘下時間，會唔會繼續積極掃貨，定係只會短炒打游擊呢?? 內地貨幣政策維持穩定，不逮今年貨幣增量速度相對GDP增長率，因為去年高基數嘅原因，相對今年一定會減慢，呢個係可能會影響今年內地資金流入香港嘅速度。不過喺疫情之後，全球各國央行仍採取寬鬆貨幣政策，以確保經濟可穩定復甦，估計內地社會融資規模並唔會縮減，增長率可保持高於GDP，而多咗嘅資金將反映喺內地及港股通資金流數據上。
最後當然要睇返港股對北水有幾大吸引力，自從港交所放寛同股不同權及第二上市公司規定後，唔少喺美國上市嘅中概股回歸，加上內地有大量中科企打算喺港股上市，部份公司對於內地資金更有一定稀缺性，相信港股對內地資金嘅吸引力只有增無減，北水今年將繼續積極南流掃貨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。