港股成交日漸萎縮 加稅自殘愚不可及
3月24日，大致多雲，日間部份時間有陽光，早晚天氣仍然清涼。雖然全球多國已開始為民眾接種疫苗，但疫情仍然反覆，世衛警告變種病毒持續擴散，全球多處新增確診病例正上升，東南亞因菲律賓疫情急速擴散，令東南亞地區確診病例大增近五成；美國過半數地區過去7日平均確診病例上升至少5%；至於歐洲面臨第三波疫情，法國巴黎再封城，德國亦已率先延長實施封鎖。市場憂慮經濟前景未明，復甦之路受阻，隔晚美股全線下跌，道指跌309點，標指跌30點，納指亦再跌逾1%。
此外，市場亦擔心為配合拜登推出龐大刺激經濟方案，需通過加稅增加庫房收入，尤其拜登政府建議3萬億美元嘅基建法案，更加需要透過加稅嚟實現。與此同時，有聯儲局官員亦警告，喺通脹風險持續升溫下，美國有機會提早於明年加息。通脹怪獸兼息魔隨時殺到，股市又點可能順風順水，不過美股市底仍偏強，相對港股呢個幾月表現，可以話愈搞愈弱。
唔係話古天后又針對整餅茂加股票交易印花稅呢單嘢，但事實確係擺在眼前，自從上月財案公布將於今年8月1日上調印花稅至今，港股升勢不單已明顯逆轉，成交持續縮水，恒指接連失守三萬九二萬九大關，反彈力度持續減弱。而依賴北水撐腰嘅高增長股，科技股更一瀉如注，唔少股份相對2月高位閒閒地回落三成或以上，近日更出現彈散走勢，一浪低於一浪。本以為高位回調三四成，殺估值殺得七七八八，調整至合理水平後，呢批股份大部份已成功尋底，豈料又遇上美債孳息趨息，令高增長股沽壓重重。唔少缸邊友貪勝不知輸，喺上月高位非但未有沽出部份股份套現，更加大注碼重倉持貨，如今一手蟹貨，損手爛腳。搞到如斯填地，基本上整餅茂都難以再推說港股轉弱，與建議上調印花稅毫無關係。
全球股市交易上，近年都設法減低交易成本以吸引客人，美國更未有收取股票印花稅，近近地嘅A股印花稅亦僅單邊徵收。但港股則倒行逆施，不減反加，對高頻及大額股票交易玩家嚟講當然不利，加稅結果必然係趕客，最終令成交減少。雖然對於北水大戶嚟講，高增長股升幅強勁，加0.03%印花稅應該問題唔大，問題係喺市況波動下，北水亦會增加短線操作，咁交易成本就會上漲，既然係咁北水索性炒少幾轉，港股交投縮水亦好正常。至於話高頻交易一向佔港股成交有限，其實正正係因為港股本身交易成本相對其他市場高，高頻交易自然難興旺，如今再上調印花稅，進一步逼使高頻交易投資者完全放棄港股。
其實睇見港交所(00388) 股價及相關新聞 股價表現，好明顯係市場已預視8月起加印花稅對其影響深遠，走勢上若跌穿440元100日線，極有可能向一浪低於一浪嘅方向發展，若然港府一意孤行，漠視業界及市場意見，僅為一年增加120億元稅款，呢個仲係預測數目，成交持續萎縮，呢百億增加稅收只係一廂情願，長遠港股競爭力被削弱，連唯一未受疫情影響嘅金融業，恐怕唔係死於疫情打擊，而係被愚不可及嘅港府高官整死，咁樣自殘同攬炒有何分別。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。