短線操作錯過低位寧錯過莫追貨
3月16日，大致天晴，氣溫見回升，未來幾日天氣轉為潮濕，一轉呢啲天氣，有新傷舊患嘅我，肯定飽受痛楚。雖然美國10期國債孳息報1.61厘，高企於1.6水平，但只要債息趨穩唔再急升，市場慢慢適應呢個息口水平，再利淡消息都會被市場慢慢消化。隔晚美股三大指數上升，道指續創新高，升174點，距33000點僅一步之遙，報收32953點。標指跟納指分別升0.65%及1.05%。
聯儲局本周將召開貨幣政策會議，市場關注當局對於國債孳息上升嘅睇法，以及通脹預期等言論。雖然債息上咗嚟，但最近美國拍賣債券成績算唔錯，日本為近6個月以嚟首次增持，而中國為美債第二大持份者，1月所持美債按月增加229億美元，目前總持有量為1.095萬億美元，創2019年10月以來的15個月最高。美債兩大持份者均見增持，反映市場喺通脹升溫預期下，已接受較高水平債息。其實古天后想講嘅係，聯儲局講咗提高通脹目標，意味住市場需要接受一個較高嘅利率水平，只要債息唔係急升，而係循秩序漸進地逐步向上，息口跟隨經濟復甦步伐下，向上修訂重返較高水平亦合理。
由於息口開始轉趨穩定，只要唔好再見急升，已調整咗超過兩星期嘅科技股股有望回穩。不過相關股份由高位回落閒閒地三成或以上，加上唔少抱團股嘅貨，北水已唔再牢牢抱緊，反而增加高沽低買短線操作，唔少貨源已派散，高位囤積少蟹貨，需要時間消化蟹貨區，即使呢批之前估值過高嘅當炒股，已成功尋底並回穩，仍需要時間整固，橫行打底，暫時難以回復之前升勢，新經濟股及高估值股份回勇言之尚早。
若然成手蟹貨可以點做，已錯過止蝕坐咗艇，呢段時間應該拎部份持貨短炒，高沽低揸盡量拉低持貨成本，呢個策略由上周已開始建議。而未有相關持貨，千祈咪見反彈回升時追入，要趁回調時搵位上車，追升買，追跌斬呢啲動作，只會削弱實力，寧作壁上觀，錯過都好過買錯侷坐。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。