科技股汰弱留強 短線波動提供建倉契機
3月11日，多雲，下午部份時間有陽光，氣溫稍涼算高。美國眾議院通過1.9萬億美元刺激計劃，總統拜登料將於周五簽署法案，市場憧憬財政刺激政策，美股做好，但納指繼續落後，表現乏力。財政刺激方案終拍板，利好傳統股，道指一度爆升556點，高見32389點，再創歷史新高，收市升幅收窄至464點，收32297點；標指升23點；納指升唔起微跌5點。美國財政部繼續拍債，10年期國債，市場反應尚算不俗，10年期債息亦回落至1.513厘。而美國2月消費物價指數亦低過預期，通脹預期降溫亦是係債息回落的因素之一。不過債息仍然企喺1.5厘之上，對高增長股仍然不利，只係市場有機會習慣較高債息水平，而高增長股回吐，舊經濟股估值得到修復，兩者之間開始搵到一個平衡點。
至於港股噚日反彈，唔少急跌科技股當然亦有反彈，不過整體港股噚日都係高開低走，升幅收窄，反映目前唔少投資者對後市信心仍未恢復，短線仍然係逢彈必沽，待急跌撈貨嘅短炒策略未變，市場氣氛仍未扭轉，較為疲弱。一如古天后所料，3月份大部份時間只係有波幅，無升幅，恒指預期喺28000至29500之間上落。唔少人認為恒指喺日線圖已仍然頭肩頂走勢，後市表現堪虞，事實上，即使恒指假穿28000，觸及27800牛證重貨區劏牛後，能守28100-28200，即未失守由去年9月低位23,124點，延伸至2月份高位31,183點，全個升浪總升幅回調黃金比0.382回調目標，經過呢一輪回調整固，後市仍可樂觀。
北水主導港股既成常態，1月份北水熱捧，抱團嘅科技股喺近期失去北水支持齊齊插水，但舊經濟股則相反正逐步走出谷底，表現大幅跑贏。喺經濟不振之際，阿爺任由股市升溫，透過財富效應支持消費刺激內需，喺舊年疫情下嘅政策取向。但內地經濟隨住疫情受控逐步回復正軌，出口漸走強，內地先推動貨幣政策正常化，除推出反壟斷政策打壓科技巨頭，強調去槓桿，唔再搞大水漫灌，明顯地今年跟去年救市基調有別。與此同時，無論A股或港股嘅科技股，正被擠壓水份，殺估值避免資產走向泡沫極端至爆破；同時為舊經濟股進行估值修復，對股市長遠發展實為好事。
不過新經濟股賣點為高增長，只要能交出堅實增長業績，高增長股喺殺掉多餘估值後，將再次回復吸引力，如高位追咗貨嘅缸邊友，捱過呢一輪調整，仍有機會迎來下一輪升浪。呢段時間正係個別具實力嘅科技股建倉好機會，之前兩日古天后已指出JATMX呢幾大巨頭，要吼乜嘢位上車，呢堆科技巨頭，只要業務前景維持良好，業務規模和盈收有望保持增長，短期波動調整，聰明投資者自能化危為機。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。