科技股調整浪中未宜接飛刀
3月9日，大致天晴，有時風勢頗大，早晚較為清涼。隔晚美股個別發展，道指曾升651點，高見32148點，盤中再創歷史新高，惟收市升幅縮至306點，收報31802點；以科技股為主的納指則愈跌愈深，收市跌2.41%或310點，報12609點；標指則跌0.54%或20點，報3821點。資金顯示板塊輪動，資金由高增長科技股，轉投傳統股，主要受到美國長債孳息上升所推動。尤其喺市場憧憬美國短期內將通過1.9萬億美元刺激經濟方案下，舊年受到防疫封鎖措施影響嘅傳統股份，今年喺封鎖措施結束，經濟逐步復甦下能重拾正軌。
雖然科技女股神，有連登契媽之稱嘅Ark Investment創始人兼行政總裁Cathie Wood向市場派定心丸，表示並唔擔心最近Ark旗下嘅ETF下跌，並認為呢一輪科技股拋售潮係一個好機會。佢話美國10年期債息急升，令市場手足無措，但科技股回調，價值股及周期股則上漲，加入牛市行情，係牛市正擴大，佢仲話長遠對投資者有利。古天后認為呢一輪長債息急漲，嚟到現水平可能差不多，聯儲局會喺今個月稍後時間舉行議息會議，或有對策控制正急升嘅長債息，例如買入長債，沽出短債，當長債息受控，回落至1.4%水平，科技股或可結束今次調整浪。
今次呢一次高增長股、新經濟股殺估值浪，令唔少散戶資金被綁，甚至損失慘重，長債息急升改變資金格局，資金減持風險資產，由股市流入貴賤金屬市場，又或調整股票投資組合減持科技股，增持受惠於債息上升或通脹回溫的傳統產業股，如金融股。值得留意係噚日招行(03968)率先回吐逾4%，現水平仲值唔值得再追內銀股，值得三思。
至於呢一次科技股調整浪幾時見底，古天后無水晶球，但可以留意幾點，首先龍頭JATMX要止跌回升，喺跌浪中回調力度最大，當見底反彈時，同樣力度會最大。第二係A股要止跌，A股未能止跌，莫講話北水唔會南下港股買貨，分分鐘仲要沽港股套現救A股，喺科技股仍然累積巨大利潤下，必然係提款對象。而大型新經濟股IPO自從快手(01024)後，其他重磅科技巨企上市計劃目前只聞樓梯響，唔見再有動靜，即係投行未肯出手，認為氣氛未回復正常，要再有大型IPO啟動，先至係科技股調整幅度，已足夠令市場回到平衡點。集齊呢三個條件，科技股調整浪方可告一段落，喺未出現呢啲跡象下，暫宜先作壁上觀，未宜入場接飛刀。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。