美團未來要靠社區團購殺出重圍
3月29日，部份時間有陽光，日間天氣炎熱，呢個星期都係熱熱哋，夏天似乎已來臨。美國經濟數據反映通脹壓力緩和，加上疫情緩和將加快經濟活動，上周五美股周做，三大指數齊齊升逾1%。道指跟標指創收市新高，分別升453點及65點；納指則升161點。市場已逐步消化美國10年期債息至今年初以嚟大幅攀升嘅因素，並開始接受債息持續趨升，即使10年期債息升至2厘水平，市場亦能接受，未必再對股市造成重大困擾。
不過上周五晚美國有對沖基金因為孖展爆煲，被迫斬倉，多隻中概股早段再顯著下跌，當中剛回流港股第二上市無幾耐嘅百度(09888)一度急跌成半，騰訊音樂更曾跌逾兩成，不過兩股喺斬倉盤結束後喘定，收市跌幅大大收窄至1%左右。騰訊音樂已表示將進行回購，但市場擔心類似對沖基金爆煲事件陸續有嚟，中概股暫時仍難言回穩。
港股上周走勢反覆，幸而恒指100日線(27964)失而復得，不過喺技術走勢，以及從成交分析資金層面上審視，港股仍未回穩，尤其係近日港元匯價表現疲弱，資金持續流出，港股整體上升動力薄弱，反彈力度亦嚴重不足。目前，恒指已初步形成頭肩頂利淡形態，不過100日線若能企穩，即收復後必須至少連續三個交易日企穩其上，兼且指數需重返28200至28400頸線區並穩，後市才能較為樂觀，目前仍待時間確認。
市場投資變相仍多，除國際形勢複雜，美國聯同英國、加拿大及歐盟就人權問題，對中國官員實施制裁，中國亦隨即作出反制，而中國近日亦見其不斷強調與北韓及俄羅斯關係，可見中國與歐美國家之間分歧難以化解，相互之間嫌隙將愈來愈大。除咗國際形勢為市場平添變數，以中資企業主導嘅港股，亦需面對內部政策風險，內地政府對科技巨企嘅監管不容忽視，預期未來可能更多措施出台收緊監管。另一方面，中概股於美國股市除牐不容忽視，對相關股份定必帶嚟震源。
講返美團(03690)業績，公布截至去年12月底止全年業績，營業額1,147.95億元人民幣(下同)，按年升17.7%。純利47.08億元，按年升110.3%；每股盈利0.81元。業績表現略遜預期，股價今日可能再度重返300元之下。美團外賣業務已形成了頭部優勢，外賣市場正朝一家獨大嘅方向發展。後續美團持續鞏固外賣基本盤，如果仍不斷蠶食餓了麼嘅市場份額，喺餓了麼節節敗退，美團日均一億單預計未來的3-5年可以完成。一單2元利潤，一日美團就穩袋2億利潤，呢一瓣業務，肯定係美團市值最大支撐。
至於到店、酒店及旅遊業務同樣係集團嘅現金牛，預計2021年會有比較大增速，尤其相對2020年疫情影響基數較低，單獨呢一瓣業務嘅市值應該要遠遠超過攜程。而集團正積極發展，投入大量資源嘅社區團購業務，仍需時間發展。美團股價自高位調整後，市值回落至2萬以下，萬幾億市值算係一個較合理估值，已有足夠安全邊際，現價再大幅回落空間有限。考慮到美團嘅成長性，社區團購業務未來3-5年可變現能力、繼續持續於高成長重要時間點；目前最大風險係要睇社區團購業務能否殺出重圍。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。