衍生工具只宜短炒 不宜長期作戰
3月18日，多雲，早段有一兩陣雨，局部地區能見度低，日間短暫時間有陽光。隔晚美股上升，三大指數均見進帳。聯儲局一如所料維持息率不變，而鮑爺亦繼續放鴿，表示未來2至3年內經濟狀況具有相當大的不確定性，強調要等到通脹、就業等目標出現「實質進展」才會收緊貨幣政策，而非按照「預期進展」提早採取行動。不過暫時未見聯儲局有任何行動遏止10年期債息上升，市場預期聯儲局可能採取嘅「扭曲操作(operation twist)」，即沽售短期國債，增購長期國債，以壓低長債息，鮑爺左閃右避未有正面回應，只係表示目前策略適當。美國10年長債息仍高企，目前正逼近1.7厘水平，但鮑爺都戴返個頭盔，表示目前嘅買債規模恰當，但如果有需要，可以改變相關政策。
睇返聯儲局嘅最新經濟預測中位數顯示，今年美國PCE通脹將達到2.4%，遠高於去年12月時預測的1.8%；但多數儲局官員仍維持2023年底前唔加息嘅法。息率未來動向維持不變，寬鬆貨幣政策有利股市向好，不過趨息嘅債息對只有高增長業績，而未有實質龐大盈利嘅高增長股不利，幸而市場已開始接受債息向上嘅事實，只要債息並非急速抽高，而係循序漸進地慢慢上升，高增長股經過一輪深度調整後，應可回穩，暫時進行整固，或進入區間上落嘅格局。
唔少缸邊友開始懷疑，喺資金取向改變，引發資金新配置倉位，即從高增長型的科技股流出，部分流往再通脹概念股，如金融、資源等股份，會否令已大幅調整嘅高增長科技脠永不超生?? 重返家鄉遙遙無期?? 其實大部份科技股基本因素未有重大變化，加上南向北水近日只專注A股炒作，大幅減少流入港股，連最積極追捧本港高增長股嘅資金都熱情不再，高增長股呢期都係有波幅，冇升幅。
古天后對呢一批高增長股前景仍有信心，無一隻股票可以長升長有唔回頭，乜嘢股份都有調整嘅時間，暫時高增長股短期已見底，若然倉位已作適度調整，又係持有實股無借孖展，JATMX呢類優質龍頭，可以長線持有，唔需要太在意短線波幅。當然自問係短炒高手，不防將手上部份持股多做短線操作，以拉低持貣成本。但係以槓桿持倉，甚至係持有衍生工具就不宜死坐，降低槓桿水平，保持實力，待更多見底訊號確認先加注。至於衍生工具好趁反彈沽出，始終輪證係有到期日，長期作戰只會消耗時間值，死坐無用，即使正股回升喺時間值消耗下，輪證都難以起死回生。再三強調衍生工具只宜短炒，不宜長坐。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。