高增長股已見底 揀選龍頭吼位上車
3月23日，大致多雲，短暫時間有陽光，氣溫仍然清涼，稍後有一兩陣雨。10年期美國國債孳息率周一由14個月高位，回落5個基點至1.68厘水平，緩和咗近期市場對科技股估值過高嘅憂慮；加上拜登政府正考慮推出3萬億美元基建計劃，推動工業等發展。美股周一上升，道指跟標指分別升103及27點，納指升幅更逾1%，報收13377點。
早於上星期，古天后已講咗，高增長股經一輪殺估值後，加上市場開始接受較高嘅債息率，即使反彈速度較緩慢，甚至一直喺接近低位橫行整固，高增長股整體已成功尋底，低位見咗。與此同時，古天后亦多次提到，只要恒科技指守住8400點，亦唔存在乜嘢科技股災。當然對唔少高追呢堆股份嘅缸邊友嚟講，高位回落二三四成，股災早已發生咗，如果無及時止蝕，咗咗深水潛艇，現價較買入價艇咗兩成或以上，依家先嚟後悔無止蝕，呢啲位先嚟打靶已無乜意思，反正整體高增長股已見咗底，衝量好自己持貨能力，就只有坐定定，等反彈。
至於邊一啲高增長股可以吼位買，都係睇住龍頭股，今個星期幾隻龍頭包括騰訊(00700)、京東(09618)、美團(03690)，小米(01810)都公布業績，呢幾大天王嚟講，有心搵位上車都係以騰訊為先，始終騰訊業績一定交到功課，預測市盈率不過三十幾倍，相對大部份高增長股，騰訊估值一啲都唔貴，想買騰訊唔使太急，分段喺610-630之間搵機會。另一隻有得博嘅係小米，除咗集團已計劃100億回購計劃外，公司發展電動車嘅傳聞不絕，估計有關計劃總會立項，呢個消息可以持續炒作，吼位26樓下上車。至於美團講真呢啲位未算吸引，穩陣計都係出咗業績再作打算。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。