三孩政策股急升回吐 留意有機被重新估值
6月1日，多雲，有驟雨及狂風雷暴，有時雨勢頗大。五窮月過去，結果唔係太窮，恒指喺5月份累計升426點，連續第二個月先低後高，五窮月並未窮，展望後市，六絕月似乎亦唔會太絕。值得留意係通脹威脅揮之不去，唔係靠嚇，通脹一旦殺到，可以急速惡化，令市況波動加劇，所以對於通脹升溫唔好掉以輕心。其中一個通脹數據美國個人消費開支物價指數(PCE)喺4月創29年最大增幅，今年內都會高企。即使通脹數字明年會因財政刺激的邊際作用下降，以及供應逐漸追上需求而減退，商品價格未來半年至一年內亦1會緩和，但係通脹憂慮仍會加劇股市波動性，
不過近日內地股市確係愈做愈好，而資金更似重新追逐科技股，噚日上海科創皮指數升逾4%，5月份累計升7.59%；深圳創業板指數亦升2.38%，5月累升7.04%。外資亦透過滬、深股通淨流入52.1億元，扭轉上周五的單日淨流出。隨住5G、新能源、科技、供應鏈本地化等多個長線結構性機遇，中資科網股中長線仍有不俗投資價值，只係短線仍受行業監管陰霾困擾，相關股份宜吼回吐分段吸納，而唔好多手高追。緊記即使近日「抱團股」再次炒起，但亦唔好太過樂觀，去年底至今年初嘅狂牛難言重現，恒科技唔重返8500至8600點，暫時都仲係區間運行。
噚日下畫內地傳嚟內地官媒報道，政府高層主持的高級別會議，為推「三孩政策」應對少子化同高齡化開綠燈，相關概念股有資金湧入，當中附助生育龍頭股錦欣生殖(01951)急升17%，預計今日將見回吐。不過估計政策將吸引資金持續入場，而政策改變或令錦欣生殖有機會被重新估值，值得留意。其實就算未有三孩政策，公司去年下半年業績已有明顯改善，即使未恢復通關，集團亦預計今年增長亦將逾20%。不過受疫情影響時間較長，短期將為利潤帶來壓力，幸而公司喺人工受孕方面有領導地位，而未來亦有潛在併購機遇。錦欣亦已於2月份曾批股集資，暫無再集資壓力。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。