上升通道未破壞 現水平先整固
12月3日，天晴乾燥，早晚清涼，日夜溫差較大，未來幾日氣溫將會進一步下降。美股隔晚個別發展，標指雖然只升6點，但連續兩日創新市新高；道指則升59點；納指由高位稍稍回落，點5點，報收12349點。疫苗好快會推出市場並有民眾接種，不過有關疫苗嘅好消息係咪已充份反映，疫苗會唔會有副作用，都令市場疑惑，究竟美股喺現水平仍有幾多上升空間。不過再有華爾街好友向市場派定心丸，指標指成份股明年每股盈利較市場平均預測高5美元，喺疫情反覆嘅同時，全球經濟表現實際上較上半年預測強勁。雖然美股喺累積巨大升幅後，市場估值已經唔平，但全球央行未來幾年維持寬鬆政策、環球貿易緊張關係降溫，以及定息收入回報唔夠吸引，都會逼使資金增持風險資產，即係股市吸引力始終大過債券。
至於港股繼續喺高位整固，雖然恒指未有企穩喺27000點水平之上，但恒指升破250日線( 25363)後，過往一直疲弱嘅傳統股亦發力，喺新舊經濟股交替接力下，整體上升動力明顯轉強。而恒指即使自高位回吐，但至今仍未有失守由今年1月回調至3月跌浪嘅反彈目標黃金比61.8%，即26100點，一日恒指守喺呢個水平之上，恒指仍然係反覆向上格局，大有條件繼續向28000點推進。
港股由低位反彈並收復前浪黃金比61.8%，技術走勢上已擺脫之前跌勢，不過喺暫時未有其他利好消息刺激下，恒指仍然喺保歷加通道內上落，要等通道收窄港股先有機會有突破。尤其係11月份新舊經濟股輪流落鑊，令恒指已呈超買，目前指數喺26100至26800之間反覆整固相當合理。尤其12月一般市況較為淡靜，波幅喺1000點之內亦屬合理預期。
噚日小米(01810) 股價及相關新聞 趁年結前標個尾會，增發新股及發行CB大舉集資逾300億元，加上唔少公司同時配股抽水，令大市出現震盪。不過古天后對小米前景仍具信心，噚日午後復牌一度跌穿配股價，特價大酬賓時段，真係唔買就笨，古天后喺另一平台亦有撰文指係上車好機會，結果小米亦秒速重返24元水平。而大行亦普遍睇好小米前景，古天后亦深信小米喺未來一兩年內，市值可以突破萬億，即係長線目標睇30元樓上唔係順口開河。至於其他新經濟股，同樣係趁調整吸納，長線投資組合內，JATMX缺一不可。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。