中概利淡消息雖淡化 但波動難免只宜炒上落
4月1日，天氣顯著轉涼，多雲，有幾陣雨。俄烏局勢未見有好轉，加上經濟數據反映美國通脹持續升溫，美股隔晚顥著下跌，標指更創算3月7日以嚟最大單日跌幅，跌72點；道指跌550點；納指跌221點。總結第一季，道指、標指、納指分別累跌4.57%、9.1%、4.95%。3大指數齊創自2020年3月以來最大單季跌幅。
市場風險胃納明顯改變，有外媒對市場人士進行調查，發現30%受訪者認為現時應購買高息股，26%認為購買金融股，21%則認為購買大型科技股。投資者相信，高息股喺充滿不確定因素嘅環境下提供回報，而包括銀行嘅金融股則受惠高利率。調查發現，超過四成受訪者認為，市場最大威脅係聯儲局政策失誤，3超過三成認為是高通脹，超過一成係指俄羅斯威脅。投資者質疑即使喺強勁嘅美國經濟下，聯儲局能否如預期般引領政策「軟着陸」。至於有關後市走向，超過五成受訪者料標指今年年尾將接近目前水平，超過三成認為將升至逾5000點，只有6%料今年尾前將出現回調，標指降至4000點以下。反映美國嘅投資者對美股後市表現仍傾向樂觀，即使喺風險胃納下降下，美股今年表現未必會太差。
至於港股完成期指結算及季結後，開始見回吐，之前都講咗22000水平要抖抖，尤其係噚日北水開始放假，至下星期三回復正常，少咗北水參與，成交難免較為淡靜。目前港股都係借住中概股嘅消息上落，不過喺中美金融戰持續下，中概股繼續成為犧牲品。不過日前美國證交會(SEC)公布喺退市名單內添加五隻中概股，包括百度、愛奇藝、富途、凱信遠達醫藥及從事漁業養殖嘅Nocera，原因係唔符合審計要求。早前不斷有傳中美喺化解審計爭議上有眉目，惟SEC主席亨斯勒態度仍然強硬，堅稱只有完全遵守美國審計要求嘅股票先至可以繼續喺美國交易。
不過今次呢個消息，未有好似3月初發引咁大嘅震盪，反映市場逐漸消化中概股退市風險。中美最大嘅分歧在於中方一直以國家安全為由，拒絕美國監管部門獲取中國企業審計底稿要求。SEC主席亨斯勒表示，美方要求嘅審計底稿唔多會包含敏感訊息，又指審計底稿是係用於確認企業收入和支出的嘅文件，並提到其他50個司法管轄區多年來亦願意遵守呢項監管要求。
其實講到底，中概股要喺美國進行交易，要接受對方嘅監管要求亦屬合理，若然真係未能符合當地審計要求，退市亦只有接受。只係中概股即使回流至香港或內地上市，就未能一如過往給納大量美國或外國資金投資，而外資對本港或內地股市嘅信心，亦可從3月份大量流出資金睇到意向，即使回流，吸金能力亦大不如前。講到底，中概股仍需要整頓，唔單止要符合內地監管要求，亦要符合美國嘅審計標準。即係今年中概股仍然係動盪嘅一年，炒作相關股份，要有心理準備接受較大波幅，又或者係有波幅，難有升幅嘅走勢。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。