中概股未必全面退市 切勿過度恐慌嚇自己
12月6日，天晴乾燥，早晚清涼，日夜溫差較大。美股上周五走軟，納指跌295點，跌幅近2%，道指跟標指分別跌59點及38點。市場對變種病毒對經濟影響有分歧，而喺全球疫情反覆之際，通脹卻持續升溫，令國際貨幣基金組織(IMF)敦促美國聯儲局加快縮減買債行動。不過上周五美股表現至差嘅，仍然係中概股，滴滴出行正式啟動於美股退市計劃，令一眾中概股跌到一仆一碌，喺美國上市嘅阿里巴巴(09988)，當晚ADR更急跌逾8%，低見109.12元。其他中概股京東(09618)及網易(09999)等，亦難逃一跌。
對於美國有意全面封殺中概股，古天后又唔係睇得太悲觀，雖然中概股喺美國除牌，無法享有較高估值，但若然退市美國，要接觸國際投資者及方便集資，回流港股上市當然係出路，而國際投資者要買入相關股份，相關股份於美股除牌後，自然要返嚟港股呢邊入貨，畢竟對國際投資者嚟講，內地企業仍有一定吸引力。
與此同時，中國證監會周日(5日)表示，正與美國監管機構溝通並取得積極進展，並指有關中方推動喺美中企退市嘅報導「完全是誤讀」。中證監首先澄清，近期有媒體報道中國監管部門將禁止協議控制(VIE，或稱可變利益實體)架構企業赴境外上市，推動喺美上市嘅中國企業退市，「這完全是誤解誤讀」。據悉，部份境內企業正積極與境內外監管機構溝通，推進赴美上市事宜。
喺中美審計監管合作方面，中證監近期與美國證券管理委員會(SEC)、美國上市公司會計監督管理委員會(PCAOB)等監管機構，就解決合作中存在嘅問題進行了坦誠、有建設性溝通，對個別重點事項推進合作方面取得了積極進展。
既然阿爺開到口派定心丸，姑且對中概股退市唔好太過恐慌，只要相關股份能符合美國審計要求，唔見得真係會引發中概股全面退市危機。大家心知肚明，喺美國上市嘅中概股，對於華爾街嚟講係一嚿肥豬肉，即使中美雙方繼續明爭暗鬥，亦無理由要打爛中美兩地投行嘅飯碗，況且所有中概股真係退市嘅話，反而港股呢邊可以受惠，港交所(00388)呢兩日逆市走強，正好證實在呢一點。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。