10月3日，部份時間有陽光，有一兩陣驟雨，下午天氣酷熱。美國國會通過臨時撥款法案，避過政府停擺，其實都係意料中事。每次財案通過前，兩黨必定玩嘢以爭取政治本錢，到限期前兩黨定必達成共識，美國政府從未因此停擺，大家已見怪不怪。再有美聯儲局委員放鷹，10年債息又創新高，美股個別發展，道指跌74點；標指幾乎持平，納指則升88點。VIX大約喺17水平徘徊，好淡雙方爭持。標指4300水平攻防戰。美國息口即使唔再向上，但保持高息引發資金回流美元，美匯指數反彈至107，由於市場已再無低成本資金，資金緊縮下，環球股票市場壓力增加，對息口最敏感嘅科技股，亦無以前咁熱炒，投資者熱情開始冷卻。
即便如此，但暫時未見科技股被大幅拋售，反而當呢堆股份跌至近日低位，有買盤低吸，即Tesla喺250美元樓下；蘋果公司喺170美元樓下，及英偉達低見420元以下，即見買盤出嚟撈貨，呢個正正係美股雖見調整，但未見被大幅拋售嘅原因。目前已有16間美企公布第三季業績，其中15間美企收都好過預期，另外逾百美企調高第四季業績指引，喺月業績支持下，資金已偷步入場買貨博業績。美企嘅業績表現，支持美股高企，業績反映美國經濟無預期咁差，企業收入仍能保持增長，去年嘅裁員潮開始，唔少公司喺成本控制方面大有改善，開始喺今年第三季業績上反映。
港股喺上周長周末前外偏靜，北水喺上周五開始放假，恒指當日就趁北水缺席大挾淡倉，恒指挾升436點，報收17809，但成交額只有676億元，心水清都知道係純粹假期前挾一挾淡倉，唔畀淡友假期坐得舒舒服服。人民幣弱勢下，中港股市難有作為，ADR隔晚已回軟，又重返17600水平左右，估計今早都係低開。
港股目前仍然係面對資金不足問題，升市無人追貨，跌市亦無貨可沽，雖然港股估值已屆合理水平，但長期缺乏資金入場，升升跌跌只係炒指數嘅大戶操控，港股暫時未見有吸引力能吸引資金入場儲貨。雖然阿爺出招打擊主要股東減持，亦限制基金惡意沽貨，但長遠要吸引資金重返中港市場，中港股市嘅上市公司，管理質素先係重點，若兩地上市公司，一直只係大股東玩財技，割小股東韭菜嘅工具，呢啲行為只會繼續趕客。
至於港股呢邊，市場雖場憧憬10月底政治局常委會會議或出台新政策，以及特首喺10月25日發表新一份《施政報告》，政商界連月來促請政府為樓市「減辣」、股市「減稅」，但呢啲措施，或只能對港股帶嚟短暫提振作用。外資一去不返，缺水問題唔解決，港股只會繼續有波幅，有波幅，冇升幅，如何吸引外資重返中港股市，先至係重要命題。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。