7月19日，多雲，間中有驟雨及幾陣雷暴，天氣炎熱。美股隔晚繼續做好，美銀及摩通公布業績後股價上升，帶動市場氣氛，加上微軟創新高，三大指數做好，道指升366點，標指升32點，納指升108點。標指成功守住4300-4350後，再創一年高位，市場仍憧憬美國息口見頂，除咗明年開始減息外，企業盈利亦將回升。
雖然經歷3月份地方銀行倒閉及擠提事件，但大銀行因此受惠由小銀行流入大量存款，息差擴闊下，盈利增速高於收入，雖然撥備金額增加，整體盈利表現唔錯，市場收貨，銀行股舡升。睇返目前美銀跟摩通嘅PE目前都係低過10倍，只要經濟唔陷入衰退，下半年撥備減少，下半年及明年盈利或有更大上升空間，資金自然睇好美國嘅銀行股。值得留意係美銀信用卡業務錄得15%增長，反映美國消費市場仍然強勁，某程度上可預示零售股業績唔會差得去邊。
至於MSFT公佈Office 365 Copilot定價為每月30美元，嚟緊更會推出每月5美元嘅AI功能訂閱服務，公司收入多咗一個新增長動力，刺激股價大升4%兼破頂，但留意目前MSFT估值已經唔便，不過美股進入咗牛市，只要無乜太壞消息，股價基本上都是向上發展。
美匯指數喺100邊沿徘徊，美元轉弱下，應該會有更多資金流入新興市場及亞太區股市，日本股市更得到股神加持，由4月開始爆升步入牛市式向上發展，南韓股市亦係年初見氐後，以一浪高於一浪姿態向上發展，印度股市喺Q2亦上升17%，只有中港股市愈玩愈縮，一浪低於一浪向下尋底。
中港股市搞成咁，主要係外資撤走，中國更掀起反外資熱潮，外資被逼撤走，資金流走令中港股市乾涸，而中國經濟卻未有喺疫情過後，經濟重啟下正常復甦，內部資金缺乏，又無外資支持，中港股市點會有得搞。內地最大產業鏈過往廿年一直支撐住內地經濟，但如今內地房地產市場如一潭死水，恒大欠債超過二萬億元係乜嘢概念，呢條數連古天后睇完都怕怕，其他內房嘅債務問題亦未能解決，中小型內房企業走上破產之路。如今連外資亦被逼撤走，中國既無外部資金嘅動力，亦缺內部資金支撐，連塘水滾塘魚都快滾不下去，雖然市場不斷憧憬阿爺出招救經濟，但缺水情況嚴重，連阿爺都無招可出，中港股市反映中港經濟，自然亦一厥不振。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。