10月30日，大致多雲，日間部份時間有陽光。上周五美股無力反彈，雖然亞馬遜業績好過預期，納指升47點收市，但道指跟標指分別跌366點及19點。標指失守4300重要支持後全面轉弱，暫時跌至4000至4250區間上落，VIX回升至21水平，淡友未肯罷休。美國息口仍然係市場焦點，10年債息再逼近5%，令其他資產價格受壓，尤其係美股估值並唔便宜，更更有壓力。本周四凌晨美聯儲局議息，市場普遍預期唔加息，但至怕係一眾官員以及鮑爺繼續放鷹，定係由鷹轉鴿，會直接影響市場走勢。雖然都預咗市場唔加息，不過最快要到明年6月先開始減息，短期喺息口高企下，美股能夠企穩已算唔錯。
美國流動性進一步收緊，美聯儲滾存隔夜熱錢再降至1.09萬億美元，喺過去半年內隔夜熱已削半。當6月國會通過美債上限後，財政部再喺7月至9月期間發行高達1萬億美元新債，進一步吸走市場流動性，隔夜錢中流走1萬億美元熱錢，正正係畀呢啲新發美債所吸走，財政部下週將公佈未來來發債情況，會間接影響力剩低呢1.09萬億美元熱錢走向。留意過去3個月，美元強勢下，環球資金均流向美元，但滾存嘅美元熱錢卻不增反降。雖然大部份已公布業績嘅美企業表現仍優於預期，但由於股價喺第二及第三季已累積一定升幅，令業績表現理想嘅美企股價，不升反跌，反映市場無意再高追美股。而明年減息預期，亦已於上一季透支咗美股嘅購買力。
至於阿爺呢邊，上星期再發1萬億元特別地方債，反映經濟情況遠遠差過預期，阿爺唯有加大中央赤字，以補貼地方政府，一來防止地方債爆煲，二來透過這1萬億流入民間，以增強經濟活力。不過今次阿爺再放水，但未見A股受惠，不過A股及港股成交上周有所回升，但恒指上周五反彈至20日線又回頭，可見資金唔願意高追，只等待回落時吸納。
內地無論地方債或內房債，基本上已無力償還，債券價值已經大幅下降，假若連其他資產價格亦持續下跌，唔單止低下層及中產出問題，就算有錢人及地方政府亦會出現債務問題，阿爺一再放水，就係希望守得住資產價格，唔出現火燒連環船嘅慘況，呢個正正係阿爺一再放水嘅原因。放水只係為守住條底線，而唔係向股市大水猛灌，呢一點作為炒家要明白，咪以為阿爺放水，中港股市可以回升，能夠止住跌勢，已經達到阿爺目的。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。