中美科技脫鈎 晶片業將獲國策扶持
6月18日，大致天晴，局部地區有驟雨，日間天氣酷熱。聯儲局雖未會喺短期內收水，但政策立場由鴿轉鷹已成事實，市場需要消化一下呢個轉變，美股隔晚個別發展。道指隔晚跌210點；標指跌1點；不過納指則升121點。雖然通脹升溫，但目前利率仍處於極低水平，有對沖基金認為喺咁嘅情況下，應該要買入股票對抗通脹，尤其係FAANG五大科技股，相關股份隔晚收市全線向上，升幅由1%至2.17%不等。
喺拜登未入主白宮前，市場都認為一向跟中國關係較好嘅拜登，將會結束中美之間過去幾年惡劣關係，並會致力修補兩者之間嘅裂縫，豈料拜登上場後，不僅未有向中國釋出善意，反而變本加厲，對中國實施更多制裁，中美之間繼續喺脫鈎之路上走，兩者似乎愈走愈遠。就連一向同侵侵唔太啱嘴形嘅財長耶倫，亦以大堆經濟理論，表示為咗保護國家安全，喺中美脫鈎一事上推波助瀾。雖然耶媽已預期美國喺部分領域將與中國脫鈎，但同時亦憂慮雙方一旦在科技層面斷絕往來，將失去全球技術整合的好處。
至於中國呢邊當然唔會坐以待斃，噚日有消息指國務院副總理劉鶴將披掛上陣，領導內地「第三代半導體」研發及製造。中國近期持續嘗試擺脫關鍵技術依賴外國嘅困局，劉鶴將領導內地「第三代半導體」改革，並為此擬定一系列相關金融和政策配套，以克服美國制裁及技術封鎖影響。噚日中港兩地一眾半導體公司股價，喺一切都只係「十劃未見一撇」嘅情況下仍全線爆升。
其實舊年已有傳聞指內地要發展「第三代半導體」，並喺關鍵材料上採取革新，透過於特定應用有更好物理及化學特性的氮化鎵(GaN)和碳化矽(SiC)等，取代目前主流材料矽作為晶片嘅基板。由於不講求縮小元件的大小，或許未必需要依賴由外國生產的最精細先進設備。
市傳中央已為發展「第三代半導體」計劃預留約一萬億美元(7.8萬億港元)經費，一部分將由中央及地方政府用於聯合投資一系列「第三代半導體」項目。據報唔少頂級晶片製造商及研究機構已紛紛向科學技術部及工信部提交方案，爭取在這項計劃中分一杯羹。政府文件亦顯示，科技部擬向某啲關鍵「戰略電子材料」，包括第三代半導體材料，安排定國家撥款經費4億元人民幣。不過目前晶片材料仍以矽為主流，劉鶴同時接旨監督喺傳統晶片製造技術，包括由美國有絕對發球權嘅晶片設計軟件、以及中芯(00981)等到頸都長仍未到手嘅EUV(極紫外光)光刻機。
始終內地呢類晶片企業仍被美國盯緊，中芯更加係被制裁對象，以至喺先進製程工藝上無法取得突破，不過業績表現暫時交到功課，以公司已表示首季嚟自歐美客戶收入佔比接近45%，目前公司產能也供不應求。唔少大行都睇好中芯前景，平均目標價28-33元左右。純以技術走勢分析，中芯股價要重返26-28元水平問題唔大，但要進一步突破，公司喺製造技術方面要加把勁。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。