中美角力再升級 金融市場或起波瀾
10月28日，早上有一兩陣驟雨，多雲，日間大部份時間有陽光。美股隔晚個別發展，道指屢創新高後回吐，結束連續三日升勢，跌266點；標指則跌23點；納指幾乎持平，升少於1點。市場消化企業業績表現，電腦作業系統「一哥」的微軟在雲業務的強勁增長帶動下，股價創歷史新高，升逾4%。另一重磅道指成份股波音則跌1.5%。
噚日中港兩地股市腳軟，主要係中概股喺美國表現疲弱，周二晚反映中概股嘅金龍中國指數更跌逾4%，原因係中企連還被美國狙擊，繼美國聯邦通訊委員會(FCC)決定取消中國電信(00728)子公司喺美國嘅營運權後，市傳電子支付終端機生產商百富環球(00327)亦遭美國聯邦調查局(FBI)及國土安全部(DHS)突擊，搜查其佛羅里達州辦公室，與百富環球系統可能參與對美國及歐盟嘅網絡攻擊報道有關。
早喺中電信被取消於美國嘅營運牌照之前，今年3月聯通(00762)美國子公司已被美國撤銷營運許可。雖然內地3大電訊美國業務比重唔多，但美國選擇再向中電信開刀，係要向市場釋出一個重要訊息，「唔理目前邊個係白宮主人，美國仍會關注中資科企喺美國構成嘅風險」。百富環球事件打後點樣發展仍屬未知數，但有消息指，兩間分別來自美國及英國嘅大型金融提供商，已開始將百富嘅PAX終端，撤走喺百富嘅支付基礎設施。
百富一向業務穩定，但調查涉及到FBI，都咪話唔棘手，未來美國企業會否接受百富嘅產品及服務成疑，目前要等公司發通告先知發展如何。但美國收緊對中資公司嘅監管已成局。而美國呢個舉動，令中美關係再趨緊張，本來下個月中美兩國元首計劃舉行視像會議，家下美國無啦啦出招針對中企，唔排除呢個中美之約添變數。
中企喺美國被打壓，長遠嚟講只有退出美國市場，事實上唔少中企已取消赴美上市計劃，正正係要減少面對政治風險。如今美國再主動出招，中美金融角力短期內勢必升級，下月初雙方在晶片方面又可能會正面交鋒，投資者要留意金融市場會否因此再起波瀾。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。