中美角力升溫 主動避險免受損
7月14日，天晴，日間天氣酷熱，周末期間有幾陣驟雨。隔晚美股三大指數由高位回落，投資者開始消化美國通脹升溫，更有白宮官員指美國通脹將回落，但未確定時間，市場觀望企業最新業績表現。道指回吐107點；標指跟納指分別跌15點及55點。港股噚日雖然反彈，但仍未企穩二萬八水平，估計暫時會喺二萬八水平稍作爭持，今日要睇ATM幾隻重磅科網股表現如何。
美國總統拜登剛於上周宣布美國接近擺脫疫情，內部問題成功處理後，有消息指將開始進行外部抗爭，矛頭直指亞太區，一方面將向香港施壓，另一方面趁變種病毒於亞太區內肆虐，有意重振美國於區內經濟影響力。由於侵侵已表明將帶領共和黨贏得明年11月國會中期選舉，拜登不敢怠慢，必定要振聲威，突顯其政績，勢將政策重心放喺中美問題之上，令中美貿易及金融戰再度升級。
而拜登率先要做嘅，係會喺呢個星期內警告美國公司喺香港經營業務好易中招，因中國內地對香港加大控制力度，令美企在港經營或開展業務風險提高。呢個警告至在嚇窒喺香港嘅美國企業，促使美企撤離香港，進一步危及香港嘅營商環境。如果呢個傳聞屬實，會係繼前朝侵侵舊年取消香港特殊貿易地位後，拜登政府首次公布涉及香港嘅商業建議。
不過企業做生意都係向錢看，香港相對亞太區內其他城市，最大優勢當然係背靠祖國，有助外國業打進內地市場。就算拜登真係作出上述警告，都係擺姿態多過實際意義，除非拜登出招更狠勁，直接影響到美國企喺香港嘅實際營運，否則呢類警告都係紙上談兵，打打嘴炮。美國白宮官員正討論涵蓋印太地區(Indo-Pacific)經濟體的數碼貿易協議(digital trade agreement)，以抗衡中國在區內嘅影響力，呢個協議目的都係圍堵中國，一旦成事，影響或更深遠。
踏入7月份以嚟，未見港股七翻身，甫開季已七翻艇，家陣又面臨中美雙方角力升級，隨時7月唔翻身就反枱，政治市一向最難估亦無得估，要喺魚缸生存，最好做定風險管理，主動避險，即係呢段時間繼續以短炒為主，咪以為個市已調整咗二千點反彈，又心雄加大倉位，一旦中美角力擦槍走火，好易走避不及。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。