中美角力戰線延伸至債市
6月7日，多雲，間中一兩陣驟雨，日間部份時間有陽光。美股上周五保持升勢，三大指數做好，主要係當日公布嘅非農數據令聯儲局難以喺夏季討論退出寬鬆貨幣政策，未有耐收水。總結一周，道指、標指、納指分別累升0.66%、0.61%、0.48%。美國一再強調隨着經濟從疫情中復甦所來嚟嘅通脹效應，只屬於短暫情況，更希望G7合作夥伴應該保持刺激經濟政策。
至於港股踏入6月走勢表現反覆，而今日恒生指數季檢生效，上周五進行rebalancing，令市況更為不穩定，撇除呢一點，港股本周要重上二萬九水平唔難，只係要進一步突破上周高位，並挑戰29500點，仍然需要成交配合。睇返內地4月M2供應增速已降至兩年新低，加上內地疫情反彈，本港變種病毒憂慮升溫，舊經濟股可能再受壓；而大型科技股或成為推動大市向上嘅主要動力。
喺技術走勢方面，恒指10日線已升穿100日移動平均線，20日線亦正醞釀升穿50日移動平均線，而恒指目前喺保力加通道中軸上方游走，通道又有擴闊迹象，唔排除恒指有機會突破向上。至於持續落後嘅恒科指走勢亦有改善，如能成功企穩50日線( 8139)，下一站可挑戰100日線( 8742)。
近日無論美股抑或中港股市表現都唔錯，但相反幣市表現失色，而幣圈近期頻遭中國政府打壓，上周六(5日)又傳出中國唔少幣圈重量級帳號遭到封鎖，虛擬貨幣幾乎全線下跌。而比特幣知名玩家Elon Musk亦暗市可能跟比特幣分手，令虛幣價格喺周末期間全線下跌。內地嚴打虛幣主要為日後推出數碼人民幣鋪路，不過以美國為首嘅G7，財長會議剛結束，計劃制訂數碼貨幣發行規則，將數碼人民幣納入全球監管框架，明顯係顧忌近期積極推動數碼人民幣發展嘅中國。與此同時，俄羅斯近日不斷放風，揚言可以迅速全面去美元化，睇嚟一場全球貨幣戰一觸即發。
中美之間角力持續，而拜登上任後，中美關係有如當初市場憧憬有所改善，反而拜登對中國制裁未有鬆手，早前就宣布擴大制裁中國企業名單，由此前嘅48家，新增至59家中企。值得留意拜登將戰線伸展至債券市場，其中兩家新被列入制裁實體名單之中嘅公司為Proven Glory Capital和Proven Honor Capital(以下簡稱PGC和PHC)，係中國主要手機生產商華為籌資嘅美元債券發行商。美國日益傾向採取資本市場制裁，並從國家安全角度利用經濟槓桿對抗中國，美元債券市場或被華盛頓選為下一個戰場。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。