中美關係似緩和 惟港股仍未脫險
8月23日，天晴，局部地區有驟雨，日間天氣酷熱。美股上周五表現唔錯，雖然市場預期Jackson Hole或現「收水」訊號，但美股表現仍堅挺，三大指數續升。至於港股上周五失守25000大關後，港股喺ADR重越25000，預期今日港股亦可重返25000大關。
上周五內地暫緩《反外國制裁法》納入基本法，而周末中證監亦表示為中美審計合作創造條件。其後美國也終於提名駐華大使，填補呢個懸空接近一年的嘅重要職位，邁向將雙邊關係重新調升至「大使級」。呢啲舉動被市場視為中美兩國可能再有計傾嘅訊號，中美關係似有所緩和。
其實騰訊(00700)經歷連日洗倉後，市帳率已跌至不足5倍，為2005年後新低，仲低過2008年金融海嘯嘅估值，可見目前港股估值有幾低殘。雖然如此，但資金對港股大失信心，尤其內地監管風暴沒完沒了，阿爺出招難以捉摸，喺監管陰霾下，港股即使反彈重上25000水平，都可能只係有波幅，冇升幅，一旦再傳嚟任何監管消息，港股只會再一次下探底位尋找支持。
港股若然本周出現反彈，恒指至少要回升至10日線(26041)及20日線(26034)交匯區企穩，港股先可以講得上脫離險境，否則反彈都係短線，加上下周一期指結算，預期恒指最多彈到26000水平都無以為繼。尤其北水仍未恢復穩定流入，而美國聯儲局有提前收水可能，均對港股構成壓力，港股再跌24000水平走唔甩。
睇返資料，MSCI中國指數已從對上一輪升浪嘅頂點累跌逾32%，而上一次出現咁大幅度嘅調整喺2018年，咁啱係累跌接近33%後止瀉。不過近日中央一直有意無意地引導資金流向「碳中和」、電動車等板塊，但對科網企業監管未曾放鬆，恐怕短期內監管風暴亦難完結。缸邊友若然科網股應趁反彈減磅，逐步換倉至政策受惠板塊，包括碳中和、電動車及晶片，而中資電力及電訊股亦係另一個資金避風港。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。