五窮月未見窮 料六月絕亦不絕
5月31日，多雲有雨，間中有雷暴，日期天氣炎熱。上周五美國公布嘅通脹數據超過預期，但市場繼續憧憬華府嘅巨額預算案可提振經濟，刺激美股上周五繼續向上，總括一星期，道指、標指、納指分別累升0.94%、1.16%、2.06%。道指和標指均結束兩周連跌；至於納指則連升兩周。不過今日美國假期，今日港股食粥食飯，都係睇住A股走勢。
人民幣近日走勢強勁，屢創3年新高，吸引外資流入A股市場，內地股市氣氛轉熱，帶動港股做好。不過暫時港股內部仍缺乏焦點，加上成交未見隨股市回升而增加，向上動力仍有待增強，今日嚟到五窮月最後一個交易日，將踏入六絕月，暫時五窮月未見太窮，六絕月睇嚟亦唔絕得去邊。
港股喺五窮月成功重上29000水平，恒指成功收復多條移動平均線，雖然月內曾失守28000關，但仍力守27500即3月份低位後回升，反映五窮月走勢唔算太差，已連續兩個月呈現低後高格局。而港股喺5月份能夠有唔錯表現，多得人民幣走強帶動外資流入，受惠內地經濟增長及貨幣政策穩定，人民幣債息率相對亦吸引，預期人民幣匯率將繼續偏強。雖然美國聯儲局已預備討論縮減買債規模，但另一邊廂拜登則繼續倡議放水，提出高達6萬億美元刺激經濟放案，估計短期內美國仍難以加息，資金因此仍會繼續流入內地。
既然預期六絕月股不該絕，6月份有啲邊板塊可以睇高一線?? 國際半導體產業協會(SEMI)公布北美半導體設備出貨報告，4月份設備製造商出貨金額達34.1億美元，按月增4.1%，按年則大增49.5%，且為連續4個月創歷史新高。半導體產能持續供不應求，預期半導體廠增加產能有利半導體上游生產商，當中代表係ASM太平洋(00522)。
除咗半導體股，沉寂一段時間嘅汽車股喺6月份或者有機會扭轉之前弱勢。中國汽車工業協會整理國家統計局公布最新數據顯示，2021年首4個月，汽車製造業實現利潤按年繼續呈現快速增長，增速比1至3月有所回落。汽車製造業累計實現利潤1,799.6億元人民幣，按年增長1.6倍，依然高於同期規模以上工業企業增速，佔規模以上工業企業實現利潤總額的6.9%。雖然芯片供應仍緊張，但半導體商積極的生產調配等舉措下，供應短缺問題將有所緩解，汽車龍頭如吉利(00175)及長城(02333)，以及電動車龍頭比亞迪(01211)可趁回調收集，料下半年可拾級而上。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。