京東物流招股或引發大市調整
2月17日，天晴，天氣乾燥，風勢間中頗大，早晚天氣較為清涼。隔晚美股個別發展，道指再創收市新高，再升64點；但標指跟納指喺盤中創出新高後回軟，收市分別跌2點及47點。雖然美國距離打敗疫情言之尚早，但隨住疫苗接種降低入院及致命人數，經濟回復正常嘅前景明確。而美國銀行最新調查發展，投資者大量湧入股票及大宗商品等資產，目前持有現金水平處於幾年嚟最低點。基本上依家搵唔到一個理由睇淡，加上俗稱「恐慌指數」嘅VIX波動指數上周五(12日)跌穿20點，反映市場的恐慌減退，加上量化基金正增加槓桿，換言之，個市暫時想跌都難。
噚日港股兩大科網巨企抖氣，輪到舊經濟股接力，古天后一向睇唔上眼嘅大笨象(00005)單日升7%，仲有其他傳統金融股亦做好，喺新經濟股回氣之際，見舊經濟股接力，明顯係市場憧憬經濟復甦，有資金開始吸納周期性股份。而經濟復甦或帶動通脹預期，油價近日升勢已反映呢個因素，三桶油呢排走強，噚日更見急升。
不過舊經濟股強勢，係咪等於要全情投入，古天后始終都係認為新經濟股為先，舊經濟股只係補位，當新經濟股抖氣時，舊經濟股有資金輪動而略為回升，但講到回復強勢，似乎喺實體經濟恢復需要較長時間恢復下，都係咁上下，暫時無謂浪費彈藥全程投入舊經濟股。
尤其係見到快手(01024)上市後，市值即暴漲幾倍，可見主流資金仍然係鍾情新經濟股。不過唔少缸邊友仍難捨棄固有思想，眼見新經濟股估值高得驚人，PE固之然係無數得計，動輒三位數甚至無PE，因此卻步唔敢買入新經濟股。其實高增長嘅新經濟股，正正有別於傳統舊經濟資產，樣樣有數得計，無限憧憬帶嚟更大想像空間，正合炒家口胃。而投行助攻，不斷更新目標價，更加逼使資金湧入鬥搶貨，而今年北水積極加入戰團，推波助瀾，令貴股繼續貴，廢股繼續廢嘅現象更為明顯。
港股行到三萬點大關，唔少股市預言家又淡友上身，指股市開始瘋狂，不過依家係資金泛濫水浸嘅情況，只要印鈔機繼續運行，股票仍然係最受資金歡迎嘅資產。呢轉個市行到幾時要抖抖，古天后無水晶球，若然硬係要搵一個調整原因，咁美國落實1.9萬億美元新一輪刺激方案之時，唔排除美股會藉好消息出貨，全球股市當然跟住齊齊嚟一次深度調整，加上再有大型新股招股期間，情況有如上月底快手招股之時，巨額資金被凍結，屆時港股又有機會出現震盪。而京東(09618) 旗下京東物流計劃最早本月提交香港IPO申請，京東物流尋求估值達400億美元，集資額可能高達40億美元。一旦出現千倍招額，即係呢一次嘅IPO又會凍結巨額資金。參考快手IPO集資420億元，超額1218倍，凍資高達1.28億元，京東物流集資額約300億元，若然同樣超額千倍，凍結資金又以萬億計算，當時恒指大約由30100點水平回落至28200點，今次京東物流招股，大市要回調大家應心中有數，有數得計下又使鬼喊驚高呼股災咩!!!
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。