人民幣勢弱 中港股市無力反彈
5月25日，部份時間有陽光，間中有一兩陣驟雨，日間天氣炎熱。美股隔晚續跌，主要係債務上限談判未有結果前，美股繼續借勢調整。道指已連跌四個交易日，跌穿33000大關，全日跌255點；標指則跌30點，暫時仍守喺4100支持之上；納指跌76點，升低12800阻力後回調。NVDA公布業績後，股價盤後大升近三成，扯高納指，科技股升勢仍然集中喺重磅科技股。
美國債務上限問題喺死線前未能達成協議，惠譽將美債AAA加入負面觀察名單，即係會有被調低評級嘅可能。10年債息抽上3.75%。除咗違約風險外，週五晚將公佈PCE數據，市場估計核心PCE持平，目前薪金增長有所放緩，但隨著生活成本上升，美國TIPS亦由15%增至18%，加咗價就無咁容易減返轉頭，呢啲都會支撐著服務性通脹長期高企不下，小心明晚公布嘅數據有輕微反彈。
3月美國出現地方銀行危機，市場押注聯儲局好快減息救市，當時10年期債息回落至3.25%，不過隨住美國債務違約風險上升，唔少對沖基金沽空美債，令債息反彈至3.75%水平。當銀行危機逐漸解除，減息機會下降，通脹仍然高企之下，美國要面對經濟放緩，企業收入減少，但美股卻仍然上升，標指較年初時升咗7%，一旦經濟有機會陷入衰退，小心美股走勢大幅逆轉。
美股回軟，中概股亦跟住跌，港股更力唔使講，跌穿二萬大關後，成交維持淡靜，仍然未有資金肯入場撈貨，小量游資於場內不同板塊之間流動，成交愈玩愈縮。加上人民幣走弱，A股持續下跌，港股反彈乏力。港股今日預期進一步下試18800支持，呢個位除咗係目前嘅重牛區之外，亦係今年3月嘅低位，一旦再度失守，唔排除進一步試18000，甚至更低水平。盤中恒指跌穿18800劏完肥牛都唔識反彈，疊埋心水等見萬八都大機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。