7月13日，大致天晴，局部地區有驟雨，日間天氣酷熱。隔晚美國公布CPI低過預期，市場憧憬加息壓力大減，美股再衝高，不過道指收市前升幅收窄，只有86點進帳，更出現陰燭走勢。標指則突破4450短線阻力，升32點；納指升逾1%，升158點，升至超過一年高位，又係靠重磅股META及NVDA等帶動。明晚將由銀行股揭開業績期，見有資金偷步開始買銀行股。
6月CPI降至3%，優於預期的3.1%，按目前預估7月再加息至5.25%計，息口已高於通脹逾2%，只要通脹唔再回升，通脹受控下，息口隨時見頂。CPI數據公布後，10年債息由4.09%回落至3.85%，10年債息升穿30年債息，出現倒掛，30年債息唔跟升，預示息口將見頂。股市永遠係超前實際經濟狀況，息口預期回落情況下，第4季度企業或重新加大投資力度，第4季美股盈利將可錄得更高增長，呢個亦係美股高居不下嘅原因。
至於港股喺人民幣回升下，連升三個交易日，修復10日線後企穩，預期可繼續向上挑戰50日線及250日線，但19400呢個位阻力唔細，唔係咁容易突破。不過預期息口見頂，科網股有運行，睇下嗰堆ATMJB有冇本事再推高大市向上挑戰阻力。
留意落後盈喜股順豐同城
呢幾日美團(03690)表現突出，喺ATMJB之中每日嘅單日升幅都跑贏，主要係市場憧憬內地繼續力谷內循環，或會推出刺激消費政策，從而推動經濟。其實除咗電商及美團呢類股份可以爆炒呢個概念，消費相關股份如物流股亦值得留意。順豐同城(09699)就係上星期發咗盈喜，預期今年中期業績可扭虧為盈，噚日股價一度回吐至10元樓下又守住，可以列入觀察類別。
盈喜通告表示，公司上半年可實現盈利，主要係收入方面有良好增長，全靠訂單密度增加、業務結構向好，能進一步提升網絡規模經濟效益。運用科技驅動精益高效嘅運營底盤，提升資源投入輸出效率，毛利率及費用率亦持續得到改善。雖然順豐同城唔算係好熱炒嘅股份，但一直有大行cover，質素有返咁上下，早於公司公布盈喜前，已有唔少大行睇好其今年業績，料可受益於上述因素，預期每單平均成本可以進一步優化。
而公司最近接入滴滴快送，覆蓋全國300多個城市，不僅反映公司作為獨立第三方平台(服務供應商)嘅中立優勢，亦滿足多元化商流及其需求，可望推動其ToB收入持續快速增長。隨住順豐同城品牌影響力不斷擴大，其市場份額跟品牌認知度不斷提升，形成更强網絡效應，吸引更多商家入駐。而公司同時進一步提高騎手團隊能效，實現更高效嘅配送服務，進而帶動業務增長及盈利能力提升。
順豐同城喺5月底被納入MSCI中國小型股指數，其股價較當時己累計反彈逾兩成，表現遠遠跑贏恒指及恒科指。再以順豐同城跟同類股份比較，估值亦遠低於同業，現價市銷率約咗0.8倍，相對同類股份美團3.12倍及達達(DADA.US)1.03倍，順豐大有條件追落後，更具值博率。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。