人民幣弱勢削中港股市吸引力
5月29日，大致天晴，日間酷熱，部份地區有煙霞。美國兩黨就債務上限基本上已達成協議，預期可於死線前通過新嘅財政方案，美股上周五偷步，三大指數炒上，道指升328點；標指升54點，重返4200水平；納指則升277點，表現強勁。之前納指跟標指升勢集中喺FAAMG幾隻重磅股，不過周五升勢開始蔓延至落後科技股，但升勢仍然集中喺科技股，其他板塊股份表現偏軟。今晚美股假期休市，雖然兩黨達成協議，推高債務上限及延期兩年，但需留意是次協議限制咗部份支出上限，未來美國政府可以動用嘅資金將有所減少。
目前美國都係以氣氛主導，尤其係市場一直憧憬今年稍後時間減息，一旦減息預期落空，加上推高債務上限後，缺錢嘅美國政府定必火速再發債，屆時將抽走市場資金，估計下半年美國或再發債達1萬億元，市場少咗1萬億資金，美股仍能否保持升勢都係問題。雖然如此，過去多年QE始終令市場熱錢充斥，全球流動性仍未見太大問題，單係3月份流入美元基金嘅熱錢已高達2萬億美元，只要美元地位無太大改變，對美股後市亦唔需要太悲觀。反而最大嘅黑天鵝係全球去美元化，令美元國際第一貨幣地位動搖。
美股周五晚反彈，港股尾段ADR跟黑期亦反彈，不過美團(03690)公布業績後，股價若然又見光死，今早港股高開後，睇怕好難維持反彈，隨時高開低走。港股最大弱點係一直欠缺資金流入，即使估值已回落至合理甚至值博水平，但喺缺乏資金支持下，只有陰乾下跌一條死路。
尤其當美匯指數回升至104水平，人民幣向下，兌美元跌穿7算後，人民幣持續走弱，人民幣資產吸引力自然下降，而內地經濟復甦不似預期，外資之前沽貨撤退後，自然再無興趣重返中港股市。只有內地資金自己炒自己，中特股炒到再高亦搵唔到外資接貨，中港股市又點能夠回復昔日暢旺。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。