人行放水大市反彈 還看成交能否配合
7月12日，天晴，局部地區有驟雨，日間天氣酷熱，而我屋企冷氣壞咗，加上英格蘭輸波，就算陽普照，我心情都係灰到一個點。幸而中國人民銀行上周五宣布全面降準，放水一億元人仔，總係苦中一點甜，估計今日港股可以反彈，恒指或有機會重返27600大關，甚至進一步向上挑戰27800水平。
「放水」消息刺激下，港股ADR上周五全線反彈，合稱「ATM」的阿里巴巴(09988)、騰訊(00700)及美團(03690)，較香港收市價高2.08至3.23%。按比例計，相當於恒指報27766點，升421點或1.52%。而美股三大指數上周五齊創收市新高，道指收報34,870點，升448點；標指收報4,369點，升48點；納指收報14,701點，升142點。
人行放水力度之大，有啲令市場意外，但同時若嚟市場對內地經濟下滑風險嘅憂慮，今個星期唔少經濟數據公布，人行放水總算及時雨，港股喺超賣嚴下，反彈好合理，只係反彈勢頭能否持續，成交是否配合，若然反彈市成交不足1800億元，擔心港股彈完又散。
目前最大問題係內地監管當局對科技企業監管未有放鬆，監管措施跟罰則仍有好多變數，若然恒指反彈後再失二萬七關，港股仍有下試26000-26300嘅可能。如中央能盡快公布監管罰則，或能令新經濟股前景較為明朗化，否則喺監管風暴陰霾下，相關板塊彈完又散。
另一方面，美國聯儲局上周五發表嘅半年度貨幣政策報告中，再重申將繼續為經濟提供「強而有力支持」直到完全復甦。不過自去年3月疫情全球爆發至今，美國瘋狂印錢已嚴重扭曲市場運作。當局長期「放水」同時，不得不透過逆回購等工具吸收多餘流動性，憸隔夜逆回購金額屢創新高。令人擔心係，過往美國經濟跟長期國債孳息率之走勢一致，亦即係跟債價背馳，皆因投資者多數預期科企業務前景跟經濟增長成正比。然而，最近市場卻出現異常情況，就係科企股價竟與債價同步，跟債息關聯性竟跌至負數，呢個現象跟2000年科網股泡沫時期一樣。
呢個星期另一焦點係美企又踏入新一季業績期，市場預期標指成份股第二季業績可能強勁上升，但亦有機會係呢一輪擴張高峰期。而盈利增長見頂，或預示美股轉弱，而美股已經歷15個月牛市，唔排除將隨美股業績表現見頂而失去上升動力。而目前全球最大經濟風險，就係變種病毒擴散，全球肆虐下拖慢復甦，咁全球股市就大條道理進行深度調整，投資者不得不防，咪見人行放水又積極加重倉位，係眾多不明朗因素下，保持輕倉上陣，且戰且走，方為上策。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。