侵侵仍未放棄翻盤 慎防美政局變化衝擊市場
12月11日，多雲，間中短暫時間有陽光，天氣又回南咁濕漉漉，天色灰灰濛濛。美股繼續個別發展，市場關注有關關紓困方案談判進展，亦已消化疫苗消息，其實美股暫時都冇乜大方向，只係創新高後喺高位整固。道指跟標指下跌，主要係市場憂慮疫情反彈拖累就業市場，因上周首次申領失業救濟人數由前一周的71.6萬人，大增13.7萬人至85.3萬人，遠多過預期72.5萬人，而前周持續申領救濟人數亦由552.7萬人升至575.7萬人，高過預期521萬人。不過科技股則做好，納指低開高走，全日仍錄得66點升幅，相信係新股經濟股Airbnb掛牌上市急升超過100%所帶動。
今年港股IPO集資額創十年新高，會計師行畢馬威預計達3899億港元，按年增長約24%，排名全球第2位，納斯達克市場排名第1，主要係螞蟻集團上市難產，令港交所(00388) 股價及相關新聞 掉失冠軍集資額冠軍寶座。不過中概股回流令IPO集資額大增，佔今年總集資額34%，預期明年將延續呢個趨勢。美國眾議院及參議院上周通過《外國公司問責案》，以規管在美上市嘅公司須遵守美國審計標準。從公司、資本市場立場嚟睇，可以選擇從美國退市，或回流至香港第二上市，或到其他地方上市。目前合符回流港股第二上市嘅中概股約五六十隻，明年中概股回歸港股上市應較本年度9間有所增加，但集資額則視乎公司而定，但港交所穩佔全球集資額三甲應無懸念。港交所直接受惠，所以古天后經常提醒大家，除咗JATMX之外，港交所亦係長線投合內必選股份，值得逢回吐吸納，若然要問古天后有乜嘢舊經濟股係長線投資對象，港交所係必然選擇。
只不過臨近年結，唔少缸邊友都提早收爐埋單計數過年，呢段時間港股成交難免縮水。加上下周一將會係美國選舉人投票日子，侵侵至今仍未肯承認選舉落敗，就大選結果提出訴訟，並已去到美國最高法院，未有放棄「翻盤」機會。目前全美國17個州群起響應德州，向最高法院提告4大搖擺州選舉違憲，為美國政局平添陰霾，缸邊友不得不提防。
一個唔覺意畀侵侵翻盤，雖然難度極高，但唔等於完全零機會，但若然成為事實，肯定對金融市場引起震盪。一旦侵侵翻盤成功連任，肯定對曾經阻頭阻勢，及偏幫拜登嘅仇家開拖，而一眾媒體尤其社交媒體必然遭殃。而中美關係定必加速惡化，金融及科技戰將愈演愈烈，對中國出招發炮係必然嘅事，全球地緣政治風險亦會提升，香港夾喺中美之間，定必成為炮灰。古天后一再提醒大家要減磅輕倉，反正今年有參與新經濟股投資嘅缸邊友，都已大豐收，何不收爐提早離場，待美國政局明朗化，明年1月再制訂入市策略，作資產配置。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。