假期逼近下周交投轉趨淡靜
1月13日，多雲有霧，初時有一兩陣驟雨，氣溫略為回升，但留意下周初氣溫再度急降。晚美國公布12月份CPI下降至6.5%，符合市場預期，美股做好，三大指數上升，道指升216點，標指重上3900水平後，隔晚再升13點，納指則錄得五連升，隔晚再升69點。自油價開始回落，CPI亦同時見頂，其中能源分類指數中汽油類下降幅度較大，但其他能源價格如煤炭等暫時靠穩，令今次整體能源分類指數跌幅放緩。
不過核心CPI降幅其實麻麻，12月上升CPI分類指數包括高佔33%的嘅住屋開支，跌幅都冇預期咁大。嚟緊1月至3月CPI降幅快慢，將直接影響市場氣氛，目前投資市場認為通脹已受控，並憧憬息口可於上半年見頂，只係FOMC喺11月連環放鷹，主要係出口術打擊市場炒賣，唔希望股市過熱。美債息率走勢更能反映真實情況，從6個月美債於4.75%掉頭，市場預估上半年只會加息兩次0.25%，息口將於4.75%見頂，低過美聯儲點陣圖嘅5.15%。
10年美債回落至3.45%，反映市場預估今年非但終止加息，甚至喺下半年掉頭減息，主要係通脹受控下，為防經濟出現衰退，FOMC就有機會結束加息周期，並開始以減息去刺激經濟。暫時美股雖然喺現水平反覆，但點睇都唔似要大跌，之前啲大行唱到美股淡一淡，睇佢哋幾時又轉軚唱好。
美股又踏入業績期，銀開股將率先派成績表，業績好壞在於能否保持增長，以及呆壞帳撥備情況，而上季唔少美國銀行已有足夠撥備，今季有機會出現回撥。銀行股見底回升，目前進行整固，只要交出一份理想業績，銀行股有望再帶動美股向上。
至於港股繼續高位整固，暫未見要大幅回落，但入市資金已變得審慎，指數重磅股輪流拉升，但一直係大市火車頭嘅科技龍頭股，呢兩日已有心無力，並掉頭向下。即使港股短線未似要大跌，但向上繼續大升嘅機會大減，過埋下星期就係農曆年假，預計下周交投更為淡靜，久守必失下，加上本輪升浪由低位已累升逾四成，港股出現一個較大幅度嘅調整亦好正常。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。