債務問題內房一拖再拖 對債權人更為不利
7月27日，天晴，陽光充沛，酷熱天氣繼續。美股隔晚唔少重磅股公布業績，先有零售商Walmart業績不似預期，拖累美股低走，道指跌228點，標指跟納指則跌逾1%，暫時美股走勢由美企業績主導。Google收市後公布業績，收入增速由去年同期的62%，放緩至只有13%，營收及盈利都不及預期，雲業務仍未止血，但盤後股價卻反彈半成，主要係股價已較高位有所調整，今次嘅業績早已priced in，市場反願意買貨。微軟情況跟Google情況類似，業績麻麻但股價上升，反映市場對美企業績反應正面，都係近日氣氛改善，市場資金仍然risk on。今晚FOMC議息，市場普遍認為今次息率將上調0.75%，睇返近日美股表現，市場上熱錢仍然多，要打壓通脹有一定難度。除咗通脹之外，美國目前仍有陷入經濟衰退危機，而近日流入美股嘅資金，正正係打賭FOMC喺經濟衰退下，不僅會提前結束加息，甚至會喺明年從新放水。
碧桂園折讓配股集資
至於內地方面，一直受內房債務問題困擾，至最近爆發供斷潮，逼得阿爺高度關注問題，周一有消息指中央有意籌組「房地產基金」救爛尾樓，咁呢個基金唔使問，梗係要靠內銀揼水。而內房及物管股，則連續兩日炒起，喺內房民企之中嘅碧桂園(02007)股價噚日更升逾一成，升幅達13%冠絕藍籌股。不過股價炒高則換嚟低價配股，以噚日收市價計，折讓12.6%以每股3.25元配股，集資廿幾億。
碧桂園喺民企內房之中，已經係償債能力較強嘅一成民企，但碧桂園無奈都要低價配售，可見資金仍然緊拙。加上碧桂園負債比率唔算低，其他內房違約事件，已嚇怕市場資金，一旦碧桂園無法持續進行再融資，未來亦有可能陷入資金困局。不過樂觀少少去睇，喺目前內房產業風聲鶴唳之際，碧桂園批股都仲有人接貨，至少市場對碧桂園未至睇得太淡。
不過內房債務問題，並非3000億元嘅基金可以解決問題，呢個基金只可以話係為內房buy time，而最近恒大(03333)被揭資金被挪用，更揭發內房問題多多，而恒大已經幾乎鐵定失救，但卻遲遲未見積極進行債務重組或清盤，時間拖得愈耐，資產流失問題更為嚴重，對債權人嚟講更為不利。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。