11月10日，大致多雲，短暫時間有陽光，間中有一兩陣驟雨。雖然美國就業市場持續放緩，為聯儲局結束加息提供理據，偏偏鮑表示稱必要時將堅定地推行緊縮措施抗通脹，因為未能確定有否有效控制通脹，偏鷹言論令10年債息急升，重上4.6%水平之上，結速美股超過一個星期嘅反彈升勢。美股高開低走，並跌至全日低位收市，道指跌220點；標指結速七連升，跌35點；納指則跌128點。VIX回升至15.29，呢個數字又唔算太恐慌，暫時未對美股構成威脅。目前美股主要由市場情緒主導，而市場情緒則取決於債息走勢。
從經濟面分析，CPI中線將回落至3%，就業疲弱等原因，令美聯儲缺乏再加息借口，但國會未能通過財政預算，政府可能最快下星期又停擺，加上大量公司債年底需再融資，令淡友死口咬住唔放，雖已收歛沽空，但仍未肯完全撤退。
鮑爺強調要進一步打壓通脹，唔單止係進行供給側改革，更需要收緊貨幣政策去配合，言下之意係短期內貨幣仍會趨緊，並暗示最快要明年下半年先會考慮減息。其實都預咗無咁快減息，但淡友認為仲有機會再加息，結果將個10年債息扯高。淡友利用悲觀情緒去恐嚇市場，11月唔加息，咁咪預佢12月加，12月唔加又話明年Q1都會加，利用市場情緒推低市場平淡倉，不過後市如何，仍要睇好淡雙方嘅實力，但美股逢低吸納睇法未變。
其實美債息難以長期高企，美聯儲官員亦明白當10年息升穿5%時，垃圾債可能出現爆煲潮，官員出口術說會加息，無非係為咗打壓通脹，而唔係想經濟爆破，所以當10年債息升穿5%，官員就會轉軚放鴿，一旦回落至4.5%樓下，危險漸過，佢哋又會放鷹，如事者市場大戶就係利用呢啲言論，去舞弄市場。
至於港股隔晚隨美股下跌，預期恒指低開跌穿10及20日線後，將進步下試回調升幅61黃金比率0.618支持位17322及17300關，失守下試17200尋找支持，順手殺埋牛證重貨區。若然重貨區牛證KO後，今日都唔反彈重返17400水平，後市都係瓜多過菜。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。