內地嚴厲監管科企 短線陣痛長遠計屬好事
7月13日，天晴及天氣酷熱，雖然局部地區有驟雨，但未能為天氣降溫，日間最高氣溫35度。美股隔晚又創新高，業績期步近，投資者普遍對新一季業績有信心，三大指數齊創收市新高，道指升126點；標指跟納指分別升15點及31點。有分析員預期標指成份股喺第二季盈利增長可達61%，更有星級分析員睇好標指年底可升至4700點，繼續睇好FAANG，認為目前要增持。
雖然恒指有所回升，但ATM等科網股表現強差人意，主要係內地監管不絕，唔單止要反壟斷之外，又話中概股要境外上市，須要經多重關卡，除中證監外，仲要埋國家網信辨同意，即係呢個部門分管咗部份金融權力，監管變得更為複雜，唔排除呢啲涉及內部權力之間角力。講到權力鬥爭，又點會一時三刻就完結了事，睇嚟科網股成為磨心，呢次有排受。
繼滴滴出行於美國甫上市，旗下叫車app即被勒令下架後；又到騰訊(00700)旗下直播平台斗魚被阻止與虎牙合併，緊接騰訊旗下騰訊音樂又出事，據報當局要求騰訊音樂放棄獨家音樂牌權。監管機構接二連三對內地科企開刀，搞到4月中已傳出已啟動來港上市程序嘅字節跳動，即抖音母公司，相關上市報道離奇被下架，昨日公司再宣布「目前無上市計劃」，更發聲明指自己「暫不具備上市條件」。市場有傳聞指字節跳動曾被政府要求處埋數據安全風險，而各投行眼見呢單巨型招股暫被無限期擱置，只有抹乾淨之前流到一地都係嘅口水之外，無奈接受現實。睇嚟相關平台股仲有一段苦日子要捱，股王騰訊亦落難，對於政策風險股，除咗避之則吉，似乎別無他法。
近十幾年來全球科技企業飛速發展，新興科技產業及互聯網公司上市後，市值動輒超過千億美元。加上呢啲企業收集咗大量用戶個人資訊及生活數據，並建立「大數據庫」進行分析。若放任呢啲公司無序發展及擴張，造成壟斷之餘，更影響到行業多樣性及競爭力外，亦極有可能危及到經濟穩定跟國家安全。如果向好嘅方面睇，內地加強監管科企，有利完善本身監管制度，跟國際接軌同時更設下「安全網」，保護市場跟內地經濟免因美國「放水」引發嘅資本巨浪衝擊，有助維持社會隱定及國家安全。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。