內地投資風向轉 或對高增長股重現熱情
5月4日，多雲，局部地區有雨，日間部份時間有陽光及炎熱。美股5月開局個別發展，道指跟標指上升，但納指則下跌，有分析指科技股喺通脹升溫升下，將面對較重沽壓，若10年期美債孳息升至2厘水平，大型科技股更會遭大舉拋售。不過美國財長耶媽則向市場派定心丸，表示拜登政府提出數以萬億美元計支出計劃重振美國經濟，美國人可以期待從支出計劃中獲得「巨大回報」，並稱通脹唔係問題，有足夠工具應對。
雖然美國通脹未必成為洪水猛獸，但疫情雖然喺個別地區受控，但作為全球第五大經濟體嘅印度，疫情已失控，變種病毒更向其他國家蔓延，尤其亞洲國家如馬來西亞、越南，甚至新加坡，均發展變種病毒蹤影，甚至已見相關本土確診病例。疫情持續令不少地區再度收緊防疫措施，窒礙經濟恢復，拖累亞太股市開局應驗「五窮月」詛咒。新興市場股市明顯跑輸歐美股市，反映資金流改變，港股噚日再跌逾1%，加上北水假期令成交額金縮水至千億元之下。
港股5月開局表現強差人意，不過港股又唔係差得好緊要，至少跌市成交額未見放量增加，只要恒指仍能守喺28000水平之上，港股其實仍於區間之內移動。當然要港股脫離短期險境，恒指最好盡快回升至100日線(28548)之上， 10日(28894)及20日(28849)及50日(29023)線漸匯聚，港股需要盡快收復呢幾條移動平均線，方能脫離險境。
至於科技股表現未算太差，反壟斷消息已漸被市場消化，ATMX雖未回復強勢，但亦守住早前底部，留意美債息走勢，只要債息保持平穩，高增長股仍未絕望。睇返內地五一長假期前，A股走勢分化，創業板升逾3%，而醫藥生物漲4.72%、休閒服務升2.82%、電氣設備漲2.18%、等板塊升勢顯著；相反國防軍工、計算機、通信、鋼鐵及用事業等板塊跌超過2-3%不等。睇返呢啲數據，資金似乎再由周期股轉向成長股。
雖然市場一直憂慮美國提前收水，但上周聯儲局議息會議已表示繼續維持貨幣寬鬆政策，亦表示通脹未成問題，未有耐到退出QE嘅時候。而美國推出第二輪財政刺激方案1.8萬億美元，具體內容上，重視國民的生活、醫療、教育等補貼，以及半導體、新能源汽車、科技等產業投資，增強咗市場對成長行業嘅信心。至於中國政府一直推動產業結構轉型升級，對成長性行業支持持續，若經濟出現放緩迹象，將加大對成長行業扶持力度。
總括嚟講，隨住國內與海外經濟、政策、企業業績等條件變化，市場環境對成長性行業仍利好，內地投資風格再轉向成長行業，唔排除北水假後回歸港股後，同樣對呢邊嘅高增長股重點熱情。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。