內地暫無意收水 惟關注炒作過熱
8月10日，大致多雲，間中有驟雨及雷暴，天氣較為唔穩定。美股隔晚個別發展，油價急挫拖低能源股，道旨跌106點；標指亦跌4點，結束升勢；納指則仍升24點。大部分標指成份股已派成績表，其中高達85%盈利超過市場預期。不過業績公布後，呢啲股票喺翌日平均僅升0.2%，情況跟第一季相似，當時業績公布翌日，股份平均下跌0.1%。投資者連續兩季對利好嘅業績表現無動於衷，令人擔心今年累漲18%嘅美股可能隨時出現較大幅度回調，加上憂慮變種病毒拖慢全球經濟復甦，玩美股玩得興高采烈嘅缸邊友，要提高警覺。
至於港股表現較為反覆，噚日多得內地公布7月CPI及PPI表現好過預期，尤其PPI升幅遠遠大於CPI，數據反映：上游通脹發酵，下游加價乏力的情況，即係經濟並未有出現過熱情況。喺目前疫情仍未見到終點，經濟復甦情況亦唔不衡下，預期人行唔會收緊貨幣政策，呢個正正係噚日A股上升，兼且帶動港股向上嘅原因。
不過暫時人行未似會收緊貨幣政策，但內地而再次重申，要保持宏觀政策嘅連續性、穩定性及可持續性。PPI上升嘅部分原因係上游價格受國際原材料供應緊張有關，鐵礦石、原油、銅材等7月進口價格按年大幅飆升。而官媒近日再發文指摘「炒芯」都係因為全球供應緊張，令炒家有機可乘。換句話講，炒令價格上升，中央一定出手干預，甚至嚴打。好似房地產咁，阿爺已一再強調房住不炒，以免房價過高推高物價。一句講晒，阿爺無意收水搞瓜股市，只係絕對唔會放過物價炒作，唔收水當然利好股市；但個別板塊炒作過熱，小心引起阿爺關注。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。