內地樓市斷供問題禍延至內銀股
7月14日，大致天晴，酷熱天氣持續。美股隔晚繼續反覆，主要受CPI公布左右美股升跌，當公布6月份CPI升至9.1%，又超出預期8.8%之際，早段美股急跌，10年債息一度由2.95%急升至3.05%，但其後10年債息又再急回至2.9%，而美股則跟隨債息上落，美股再度反覆，單日波幅閒閒地2%。至收市美股三大指數始終要報跌，但相對上月公布超出預期嘅CPI後急挫，美股隔晚跌幅可以話相當收歛。
今次市場對CPI再超預期反應未如上月般強勁，主要係市場相當喺油價近日回落後，CPI指數應該見頂，雖然市場已預咗今個月聯儲局議息會議將再加息0.75厘，甚至有四成預期估計加息幅度達1厘，但長短債息出現倒掛，明顯係市場估計，當今年底息率升至3.5%後，減息周期或就此完結，一旦經濟出現下滑，明年中開始甚至需要減息。
市場對息率走勢有咁嘅預測，原因係相信美國已步入滯脹。近日美股單日波幅擴大，日升日跌令市場無所適從，但美國經過十幾年持續放水下，流動性仍然充裕，市場仍有大量熱錢，但喺未睇清前景嘅情況下，稍有消息就令資金走人，令美股出現極度反覆嘅走勢。
要令民眾對樓市重拾信心
至於港股跌穿21000心理關口之後，走勢偏弱，而內房斷供問題，不僅令內房及物管股被大幅拋售，斷供問題已開始令市場擔心內銀股受影響，唔單止係一般民眾斷供令壞帳上升，斷供及爛尾樓急增，令市場擔心惡性循環之下，連本來財政問題唔大嘅房企，亦可能出現資金周轉問題，連鎖反應及惡性偱環之下，令內房及物管股整個板塊暴跌。
如此同時，內房斷供問題，除咗有機會令內銀嘅壞帳急劇上升，內地樓市一旦出現崩盤性下跌，將會嚴重影響內地經濟，銀行作為百業之母，當然亦嚴重受影響，呢個亦係資金逃離內房物管股板塊之餘，亦大手拋售內銀股。暫時呢兩個板塊嘅沽壓嚴重，要待阿爺出招點樣搞返好個樓市，至少要挽回市場對樓市信心，問題係喺強美元情況下，內地亦面對資金流走問題，缺水情況下，點樣去令民眾對樓市重拾信心，將會係內地一大挑戰。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。