內地監管唧牙膏 難料幾時唧完兼罰完
8月9日，多雲，間中有驟雨及雷暴，下午短暂時間有陽光。美股上周五個別發展，道指跟標指齊創新高，道指升144點，報收35208點；標指則升7點，報收4436點；只有納指跌59點，報收14835點。不過港股夜期跟ADR則偏軟，較上周五收市下跌。
內地企業接連面對監管收緊，涉及網絡視頻、生長激素、遊戲、教育，甚至配方奶粉等行業，打擊大市氣氛。上周恒指表現反覆，雖然上周五北水透過港股通買入量創逾兩個月以來最高，但後市能否持續反彈，仍有待觀察。而中國跟美國本周將公布通脹等重要經濟數據，港股亦將踏入業績高峰期，市場焦點將集中喺個股身上，投資者傾向炒股唔炒市。
繼騰訊(00700)跟阿里巴巴(09988)先後被罰款後，輪到向美團(03690)開刀，有消息指，內地監管機構擬以「二選一」濫用市場支配地位為由，對美團處以約10億美元(約78億港元)罰款，並要進行整改，罰款安排可能會在未來幾周內公布。另一方面，亦有傳聞指中國政府多年來為互聯網行業提供嘅稅收優惠將縮減，部分業務已不再被列為可享10%稅率嘅「重點軟件企業」，更預告絕大多數科網股之後不會再享有10%稅率。
官媒日前曾發表評論，提到遊戲業稅收應向傳統行業「適度看齊」，更預告業界要「做好心理準備」，上述科企再唔享有稅務優惠嘅傳聞，跟官媒講法一致，難怪市場揣測中美鬥爭持續下，過往購到盤滿缽滿嘅科技，都要乖乖向阿爺進貢。不過市場對阿爺對科企監管，由驚慌已漸成習慣至麻木，市場亦仍為即使科企稅率跟傳統行業睇齊，龍頭ATM應能承受。只係阿爺嘅監管政策一直以「唧牙膏」方式公布，「唔知擠唧到幾時」或者「罰完未」，喺不明朗因素持續困擾下，ATM股價短線難以勁彈，上面又有大堆貨恭候，ATM近日將繼續有波幅，無升幅。
既然ATM巨頭無乜運行，作為恒指權重股，恒指亦將受累，令反彈之旅變得更為艱辛。睇返上月底恒指喺24800見底後反彈，曾唯下一個上升裂口喺25500點水平，唔排除呢個星期稍有利淡消息下，恒指將回補呢個裂口，不過利淡消息嚟嚟去去都係有關內企被監管，相信回補完呢個上升裂口，港股有機會重回反彈之路，只係暫時26800至27000水平，反彈阻力將會變得更大。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。