內地監管沒完沒了 唧牙膏式持續出招
8月5日，多雲，間中有驟雨，狂風及雷暴，稍後局部地區雨勢頗大。隔晚美股個別發展，經濟數據反映美國就業市場復甦之路並非一帆風順。道指跌323點；標指創新高後跌20點；納指則升19點。至於美企業績表現繼續唔錯，只係公布業績相關股份，績後表現迴異。美國經濟復甦或受變種病毒影響，加上貨幣政策未來趨向緊縮，或令美國債息上升，美股回報率或受打擊，而科技股估值較高，更容易受到利率上升影響，美股回報率或減少，定必令美股出現較大震盪。
內地監管風暴未有停止，由反壟斷法去到教育股「雙減」，風眼呢兩日吹到網絡遊戲方面，雖然上周官媒以鴉片比喻網絡遊戲荼毒社會嘅文章下架，並刪改相關字眼後，網絡遊戲股龍頭大哥騰訊(00700)噚日反彈，但內地官媒《證券時報》周四(5日)再發表評論。評論表示，遊戲作為文化娛樂嘅一種休閑方式，能夠喺中國發展成數千億元巨大產業，係內地長期鼓勵新興產業發展壯大嘅碩果，當然也有美中不足之處，喺行業發展中要保護好青少年，喺遊戲設置上防止過度花錢，過度沉迷。同時評論亦指遊戲行業作為軟件服務業享受稅收優惠，一直為人詬病，未來稅收上遊戲行業應該跟傳統行業睇齊。
似乎阿爺對於監管科技企業未有手軟，對於各行各業監管仍持續，上周中監管約見國際投行巨頭解畫，呢頭解畫，嗰頭又出招，難免令市場無所適從。投資者為減低風險，上周大幅拋售政策高風險股份後，睇怕短期資金唔全重返相關股份，呢啲股份短期都係有波幅，無升幅。
唔單止遊戲業要管，經常都話吸煙危害健康，電子煙當然更加要管。雖然內地電子煙品牌悅刻母公司霧芯科技宣布，其申報的電子煙臨床試驗項目，已在中國臨床試驗註冊中心(ChiCTR)，及世界衛生組織國際臨床試驗註冊平台(WHO ICTRP)成功註冊；但內地官媒隨即發文籲「警惕電子煙流向未成年人」，應進一步加大對向未成年人銷售電子煙嘅打擊力度。其實今年3月份，阿爺已曾向電子煙發炮，不過今次官媒再發文，似係要加強監管，擔心部分電子煙依舊在向未成年人群體滲透，潛藏風險也值得警剔。而港股嘅電子煙股思摩爾(06969)早於3月已到一仆一碌，雖然今日股價未必好似3月嗰次咁大幅下跌，但股價高位回咗落嚟，已嚴重內傷，亦唔再係資金留戀嘅當炒增值股，咪多手入場博反彈，因為呢啲股份好明顯之前炒作過度，大戶早已高位套利，飽食遠洋，睇樣點都唔似會重新入場。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。