內地監管沒完沒了 港股表現仍反覆
10月12日，3號風球嘅早上，仍有陽光兼雨都無一滴，不過留意下午稍後時間或風雲色變，晚上更有可能改掛8號風球。美股隔晚表現反覆，道指早段曾升逾200點後回軟，最終倒跌250點收市，仲係跌到全日最低位收市；標指跟納指則分別跌30點及93點。雖然上周五公布嘅就業數據表現麻麻，不過未如理想嘅就業數據，並未緩解市場對聯儲局即將縮表嘅憂慮。
由於非農就業人數嘅三個月移動平均線穩定喺55萬人，估計喺明年7月之前彌補返疫情大流行相關嘅就業損失。就業市場嘅復甦已經取得良好進展，估計聯儲局可於11月開始縮減購債規模、明年6月左右完成縮債。而通脹持續高企，更逼使聯儲局喺完成縮表後，或更快加息步伐。
事實上，喺強差人意嘅就業數據公布後，美國10年債息並未有回落，反而再抽升至1.6厘水平。債息高企反映市場對美國退市預期愈嚟愈高，就業數據遜色未令聯儲局縮表計劃有變。美國10人30年期收益率已升至6月以嚟高位，但短債幾乎未有變動，令收益率曲線愈見陡斜。愈陡斜嘅收益曲線，對股市嚟講並非一個利好訊號。
至於港股呢邊，美團(03690)被罸款34億較市場預期少，竟然成為資金從新流入科網股嘅藉口，市場憧憬內地監管風暴告一段落，但古天后對此甚表懷疑。話口未完，監管機構嘅焦點，由科網企業轉移至金融機構。有消息指，習大大向中紀委下指令，審查至少25家國有銀行及其他金融機構，要求呢啲金融機構釐清與大型私營企業嘅關係，以作為調控資本主義發展嘅部份措施。睇嚟內地監管機構，完成整頓科網股後，下一個整頓對象係金融業，聽聞今次嘅監管措施會係呢十年以嚟最大規模，仲會涉及所有領域。有知情人士表示，對金融業審查結束後，如發現有不當交易行為，將依法追究刑事責任，並會對有關單位予以紀律處分。
即係話內地監管沒完沒了，只係唔同行業喺唔同時間進行，對大市嚟講始終係一個不明朗因素，呢個因素將令到港股表現反覆，難以穩定地回復升勢。暫時大市將於24000至25400之間上落，暫時策略以保守及短炒為主，多持現金可保平安。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。