內地監管落重藥實為去泡沫化
7月7日，大致多雲，間中有狂風驟雨，局部地區有雷暴。美國股市假後個別發展，道指跌208點；標指結束連續七日升勢，跌8點；納指則再創收市新高，升24點。內地持續對科網企業進行監管，滴滴出行旗下網約車app被勒令下架，拖累股價再跌近兩成，上市不足一星期，股價持續下跌，已有投資者欲提出集體訴訟。同被監管機構審查嘅滿幫集團跟看準科技，股價亦分別跌6.6%及近16%，其他中概股亦捱沽。
內地監管機構對各個主要領域行業監管進一步收緊，從房地產、科技、教育、生科醫藥、大宗商品，以至虛擬貨幣，實行全方位監管，若然稍有唔聽話，好似滴滴出行咁，叫咗咪心急赴美上市，但仍先斬後奏，即被嚴懲，叫車網業務面臨停頓整改風險，股價啱啱上市即插水，睇嚟經此一役，應再無企業夠膽以身試法。
內地監管風暴，令港股缸邊友叫苦連天，亦唔明阿爺點解樣樣要管，令股民喺魚缸無法覓食，叫苦連天，怨聲載道。其實阿爺展開一連串監管行動，實在用心良苦，皆因全球央行因為舊人爆發世紀疫症關係，大開水喉欲刺激經濟，面對通脹升溫，但美國財金官員則口徑一致，再三強調通脹僅屬短暫現象，繼續大開水喉，任由資產泡沫繼續澎脹。
不過中國意識到泡沫一旦爆破，將對中國經濟構成不能彌補嘅傷害，所以積極去槓桿，喺唔同產業進行整改，志在為泡沫放氣，去氣泡化，以防止一旦美國金融泡沫爆破時，被捲入旋渦。雖然短線經濟利益或受影響，但總好過陪美國一齊癲，無節制地放水，令企業債務及資產價格持續泡沫化，一旦美國一句收水，中國定必被拖累。
刻下中國對各領域進行監管，一邊為泡沫化經濟洩氣，另一邊則加快人民幣數碼化發展，藉此可望擺脫美元霸權支配，同時鞏固國際地位。不過喺呢個過程當中，難免有陣痛，各缸邊友要有心理準備，年初狂牛已不復見，反而美股亦下高處不勝寒，要為突如其來大幅調整做好風險管理，現階段不宜進取，以守代攻為上策。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。