內地第二季基金募集情況未如理想
4月14日，多雲，間中有一兩陣微雨，短暫時間有陽光，雖然氣溫唔算低，但今朝感覺上係清涼咗。美股隔晚個別發展，標指又創收市新高，道指則跌68點收市，納指發力升1%，收市報13996點。無幾耐之前，小型股和周期性股份仍表現突出，主要因為投資者押注美國經濟重啟，但如今投資者開始意識到經濟要真正復甦比想像中困難，企業面對供應緊張，從原材料、物流到勞動力等等，隨住企業公布首季業績，只要有更多負面消息出現，投資者或會更加清醒，市場將焦點放喺經濟復甦能否正真回到正軌上。
阿里巴巴(09988)被罰巨款後，又到針對旗下螞蟻集團嘅金融科技業務整改，公司估值難免受壓，幸而阿里早已「自我調節」，股價自高位大幅回落，今次被罰款反而被視為不明朗因素消除，股價有得彈。相反，其他科技巨企或成為下一個被政策針對嘅目標，唔知邊日阿爺又搵個藉口判巨額罰款，近日呢類股份都係有得震，冇得瞓。
而繼騰訊(00700)被大股東減持後，噚日輪到美團(03690)有大股東批股疑雲，由於聯交所中央結算系統(CCASS)數據顯示有投資者將逾3億股或5.12%美團實名持股股份轉由高盛持倉，此舉可能係美團主要股東為減持配股鋪路，美團股價噚日跌到一仆一碌。不過美團就此表示，CCASS嘅變動係股東轉移股權及更換托管嘅一種常見操作，呢啲情況喺其他股票上經常會發生。上兩次美團CCASS有相似規模股數嘅大額變動時，都未見有任何配股減持活動。
美團嘅解釋係咪可以消除疑慮，古天后唔敢講，事關無論騰訊或者另一主要股東紅杉資本真係要減持，當然會跟美團先作溝通，但呢一刻未進行減持配股，唔等於下一秒唔減持，總之都係小心為上，切忌見升追貨，見跌追沽。
事實上，喺踏入第二季呢兩星期以嚟，港股成交持續委縮，北水未見喺新一季進行配置，科技股未見有資金流入。古天后向內地基金界朋友收風，4月以嚟已經有7隻基金需要延長募集期，即係收唔夠籌無水到，更有兩隻基金宣布發行失敗，可見基金集資情況並唔理想，暫時股民對市場嘅熱情仍然冷卻，甚至冰封。而基金界朋友表示，呢一次基金發行市場態度冷淡，呢個趨勢或持續整個季度，即係第二度股市迎來資金增量嘅機會率甚底，喺缺水情況下，第二季港股，尤其係極度依賴北水嘅新經濟股及高增長股，都唔慌有運行。稍為有安慰嘅係內地最大規模嘅30隻公募基金，未有對TMX呢幾隻巨頭進行倉位調整，雖然騰訊、美團跟小米(01810)已較高位調整咗唔少，但呢批基金對佢哋仍不離不棄，硬食呢一個跌浪，某程度上反映內地基金對呢批股份前景仍睇好，願意SH唔放，咁作為散戶嘅就只有二仔底死跟。仍然持有大量新經濟股嘅缸邊友，喺2月高位時未有減磅落車，目前可以做嘅只有多作短線操作，高沽低揸減低持貨成本。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。